ياوجودي يابو ريان

[بدر الحافي]

ياوجودي يابو ريّان قبل الغروب = يوم ينحل شعاع الشمس من عينها
ساعةن تجتمع فيها علي الذنوب = والخطايا تشد الحلق ب ايدينها
لو يجي خاتمي فالصدر فصه يذوب= حزةن تخنق الانفاس ياشينها
في عيوني تضايق خاليات الدروب=والبسيطة تعذرني ميادينها
اشرب الما قراح وفوق كبدي يروب= كأنه السم يمشي مع شرايينها
لابسن من ثياب هموم الايام ثوب =و المصايب توجه لي نياشينها
الرجا صوب وعيون المقادير صوب=من طرف حدها تاكل بسكينها
مالقينا على متن السعادة ركوب=فرحة العمر بالاحزان طاوينها
كم نبيها شمال وتبتدي من جنوب=وكم على غير ما فالبال راضينها
وجه الايام من بعض الوجيه محسوب=لون الاقدار ياخذ من تلاوينها
علقتنا الليالي في هرومن نصوب= كأن الاعمار من مخباه شارينها
ان تبيّن منافق وان تكلم كذوب=وان ذكر هرجته ينسى براهينها
نصف عمره ضلال وراس ماله عيوب=مايجمل علومن فيه هاقينها
مانفع بارقن تشعى مزونه هبوب=لو على القاع تسبقها ودادينها
اشهد اني على بعض الامور مغصوب=داير الحول كمّل باقي سنينها
حجةن نورها في كل درب محجوب=يجهل حروفها مخطي عناوينها
ياحبيبي تجوّد في وصال القلوب=لا تجي دمعتك مابينك وبينها
دمعة الحزن ماتملا من الجفن كوب=بس تملا صدور الناس في حينها
قطرةن من هدب تنهار منها شعوب=تذبح الارض وتثوّر براكينها
الهوا لك وانا لوقلت اهوّن واتوب=لهفة الشوق ماخفت موازينها
مد كف المحبة والمحبة تنوب=عن نفوسن نزعلّها ومرضينها
ماتضيق الصدورألا بغيض القلوب =خل دمعتك لاتكسر نظر عينها

بــــــــــدر الـــحــــافــــي

[بنت قبيلتها]

رائعه اخرى من روائعك صح لسانك وعلا شانك
تقبل مروري

[ناصر بن سعود]

ماشاء الله

صح لسانك يابودباس

كما عهدناك لاتأتي الا بالجزل

الله يحفظك

مع أصدق الود

[برق الحيا]

بدر



صح لسانك

[سلمان عزيز]

صح لسانك يابودباس جزله من جزل

[شباب الحافي]

ابودباس

صح لسانك

على القصيدة الجزله

وتقبل مرورى

[مهموم222]

بدر
صح لسانك مافيك حيله مبدع دائما الله يحفظك يارب
تقبل مروري,,,

[النايفه]

دمعة الحزن ماتملا من الجفن كـوب =بس تملا صدور الناس فـي حينهـا
قطرةن من هدب تنهار منها شعـوب = تذبـح الارض وتثـوّر براكينـهـا

الله عرفت قيمة الدمعه فاكرمتها بهاذين البيتين

التي اجزم ان لم ياتي لهن شبيه فيي وصف الدمعه

لاماضي ولا مستقبل

صح لسانك الشاعر النادر بدر الحافي

ولك اجزل الاحترام

[ابو تركى محمد]

تسلم يمينك

[فهد مزيد الحافي]

قمم الشعر تتهاوا واحدة تلو آلاخراى ................................ امام بدر دباس ........................ تحياتي وتقديري