محاوره بين النايفه وبنت قبيلتها

[النايفه]

االسلام عليكم ورحمة الله وبركاته

احب انقل لكم محاوره جرت بيني وبين بنت قبيلتها على الماسنجر


النايفه

والله ان ضيوفنا شر(ن) علينا=طولوها يالربع واصله قصيره

بنت قبيلتها

اخس يابن الرجال الميامينا = هالفعل ماهو فعل بنتن اميره

النايفه

ان جلستي لك عهود ن حافضينا=وان ذهبتي لك حشمه كبيره

بنت قبيلتها

وش خذينا من حكينا وش خذينا= غير زعلات وعلومن مستديره

النايفه

افهم الموضوع يالدر الثمينا=الوجع بالقلب والرجل الكسيره

بنت قبيلتها

ماانكسر لي رجل والخاطر حزينا= والفرح خلى قليبي في حصيره

النايفه

وش يفيد الحكم وحنا حاكمينا= والخوي للغير غيري يستشيره

بنت قبيلتها

ان حكمتوا ربعكم حنا حدينا= مالكن نصف الكره واهل الجزيره

النايفه

ملهمه بالشعر والشاعر فطينا=واقعن من قش ولا من بعيره

بنت قبيلتها

لاوقع علف الغنم فوق الفطينا = اترك اعلافه ودور له شعيره

النايفه

ناخذ الهوجاس ونعرف الكمينا= والجمل وشجاه مانسمع هديره

بنت قبيلتها

ماشكينا من جملنا ماشكينا= وش يهمك بالجمل ولا هديره

النايفه

انتخا الهوجاس وحنا ينتخينا= الوبر منبوذ والناعم حريره

بنت قبيلتها

اخذي العلم وهذا فوقه يمينا = ابن عمي والبشر غيره صغيره

النايفه

لو صفا المشروب حنا ماصفينا =ناخذ المشهور ونعطيكم جفيره

بنت قبيلتها

يالعزيزه فعلنا موروث فينا= فخرنا بعيالنا واهل العشيره

النايفه

جرحكم عطيب وغيره مابغينا=وخلي الدكتور يدور لك خبيره

بنت قبيلتها

تفخرون بحاتم وحنا روينا= من فعال عيالنا في كل ديره

النايفه

من تبرا من اربوعه سافهينا =ماخذينا من كلامه ياصغيره

بنت قبيلتها

الصغير اللي من العالم بلينا=نعمى عيون الحسد لو هي بصيره

النايفه

مايضرالطعن بالكتف السمينا =يظهر الصديد والشلفا عسيره

بنت قبيلتها

ماتجرا وانطعن مخلوق فينا= وانتم اثار الطعن فيكم كثيره

النايفه

ابرقت جنوب وانتم راقدينا=والمياه الكم ماتطفي سعيره

بنت قبيلتها

من كثر مافي الشجاعه مالكينا= ساكنين بقلب نجد وبالجزيره

[فهد اليابس]

والجمل وشجاه مانسمع هديره

هههههههههه
صح لسانك يا النايفه

بيت مدفون


وش يهمك بالجمل ولا هديره
هههههههه

صح لسانك يابنت قبيلتها
رد وافي

[بدر الحافي]

االله الله

ياسلام

بدع رائع
نقض رائع

اعجبني الكثييييييير من الابيات


لاهنتواا والله

[شباب الحافي]

صح لسان الشاعرتين

على المحاوره الجميله

[ابن مجلبه]

صح لسانك يالنايفة

وصح لسان بنت قبيلتها


محاورة جزلــــــــــــــــــــة



لاهنتي يالنايفة و لا هانت بنت قبيلتها



أزكى تحية لكم

[الجذع الروقي]

صح إلسان شاعراتنا وفالكم البيرق ...
تقبلي مروري ...

[بعيد المدى]

محاوره جميله جدا

صح لسانك يا النايفه

وصح لسان بنت قبيلتها

وابيات في قمه الروعه

سلمتم اثنينكم

[النايفه]

اشكر جميع من كتبو تعليق على المحاوره

واشكر المشاهدين

ولكم الاحترام والتقدير

والى الشموخ والعلو يامنتدى الحفاه الراقي بوجود اهله

[بنت قبيلتها]

كل الشكر لك اختي النايفه على مانقلتي وهي افضل مفاجأه لي
وكل الشكر لكل من مر وعلق هنا

[ابو تركى محمد]

الله يونسكن بالعافيه

امتعتنا بالمجاره

شكر