مرزوق الحافي (يمدح المؤسس الملك عبدالعزيز)

[ناصر الحافي]

السلام عليكم ورحمة الله وبركاته


قصيدة في مؤسس الدولة السعودية الملك عبدالعزيز ال سعود رحمه الله


ونالت نصيبها بان حضيت بالمركز الاول في ملتقى قبيلة عتيبه الهيلا بجائزة أفضل قصيدة في مدح المؤسس الملك عبدالعزيز


للشاعر / مرزوق بن سعيد الحافي

تنفّس الصبح وانفاسـه خذتهـا الصـدور=اللي تـدور بلفـح القيـظ حلـو المهـب
هبت بركته على الأمـه بوقـت البكـور=في ديرةً منزلتها ( فـوق هـام السحـب
الديـره اللـي اهلهـا مالحقهـم قصـور=اهل الوفا واهل المعروف واهـل الشبـب
جيت استعيد الزمن واقرا مابين السطـور=من قول جدي وابوي ومن صدوق الكتـب
ومديت للفكر فالوقـت المقّفـي جسـور=وحولت من قبل قرن وعشر وسط العـرب
وعبرت لدروب معهـا يستحيـل العبـور=ومن بين اهل نجد والعارض ثنيت الركّـب
ومريت فأسواقهم والعصر غير العصـور=وجلست اشوف المواقف كلها عـن كثـب
هـذاك قاتـل وذا يبطـش وهـذا يجـور=وهذاك مع جوعه اعياه المرض والتعـب
حياتهـم بائسـه وايامهـم فـي دبــور=بين انقضاضة مغير وبيـن قبسـة لهـب
وجانا البشير يعدي والعلم علـم السـرور=قال ابشرو بالزعيم اللـي يفـك النشـب
جاكم معزي قوي الباس وافـي الشبـور=قد سل سيف الصلاح وجاء يقود السّـرب
سيـلٍ وردكـم ولكـن مابدربـه حـدور=للخير راعي ولاهل الشـر مـوتٍ قـرب
اقبل وقفت عن ارض الخير ريح الكـدور=من طل وجه السعد وجه النكـد منحجـب
عّـدل وبّـدل ولا لحقـه بعمـره فتـور=طالت يمينه على الكايـد وسـوا العجـب
له هيبةًً منّهـا الاعـداء تلـوذ الجحـور=هيبة فعل ماهي بهيبـة هـروج وصخـب
لاقيل من فارس الفريّـس قلـت مخبـور=ولاقلت عنّـه يقولـون العـرب ماكـذب
من علو همه ومن سطوه ومن طيب شور=ومن جل حكمه ومن حنكه وطيبـة نسـب
بأمر الله اجتث بـذرة زارعيـن الشـرور=ومن سار بأمر الشريعه .. بيغلب ما انغلب
ومر الزمن والبلد تنعـم بخيـر وحبـور=امن ومعيشة رخـاء وانعـام ماتنحسـب
واللي وضع لأسم شعبه فالمعالي حضـور=يستاهل انا نحطـه بيـن عيـن وهـدب
اشرق غلاه بقلوب الشعب بأشعـاع نـور=تغرب شموس وتفيض نفوس قبل يغـرب
وان قلت عبدالعزيز اهتـز فـيّ الشعـور=من يقدر يوّصـف التاريـخ ياهـل الادب؟
معين حبـه غـذا شعبـاَ بذكـره فخـور=لـو ينهلـون الخليقـه كلهـم مانضـب
قلته وانا اليوم امر مـع الشـوارع وادور=مابين خضر الـزروع وعاليـات القبـب
واقول ياسيرة الراحـل نسيمـك عطـور=تهـب بقلوبنـا دايـم بحـلـو المـهـب

للشاعر / مرزوق بن سعيد الحافي

[مرزوق الحافي]

صح لسان الشاعر/مرزوق سعيد الحافي



ولاهنت أخوي ناصر على النقل الرائع والممتع



تقبل مروري تحياتي لك

[ناصر الحافي]

الشاعر مرزوق ابو شيبه


شاكر لك تواجدك في متصفحي

[طالب الحور]

الشاعر ناصر الحافي
مشكور على القصيدة

[ناصر الحافي]

يعطيك العافيه يامبارك

[خالد بن عايض]

صح لســـانه

ولاهان منطوقه

ولاهنت ياناصر على الطرح

تسلم يمينك

[ناصر الحافي]

ياهلا والله ياخالد


اسعدني تواجد واطلاعك

[بن كليفيخ الوافي]

صح لسان الشاعر
مرزوق الحافي

ولاهنت اخوي ناصر علي النقل
مشكور وماقصررت


تقبل مروري

بن كليفيخ الوافي الحافي

[عامرالحافي]

صح لسان الشاعر/مرزوق سعيد الحافي
ولاهنت أخوي ناصر على النقل الرائع والممتع