الشعر تعريفه بدون أية جدال

[ناصر الحافي]

السلام عليكم ورحمة الله وبركاته

ماهو الشعر؟




كما عودنا الشاعر القدير نايف بن معلا المغيري العتيبي على جزالته
نقف هنا أمام درة من درر قصيدة ويصف الشعر بطريقته

الشعر تعريفه بدون أية جدال=( كلام له معنى مقفى وموزون )
ولو قالوا أبا أقول عن كل الأقوال=هذا الصحيح وقولوا اللي تقولون
ماهو كلامٍ كيف ما قيل ينقال=وش لون ؟ مدري ! كيف ؟ ياكيف ! وش لون ؟
لا قافيه ، لا وزن ، لا نعت ، لا حال=لا وصف ، لا تشبيه ، لا شكل ، لا لون !
يعني سوالف بس من غير منوال=سولف وأسولف وأكثر الناس يوحون
حتى لو إنك جبتها مالها جال=أهم شي تكون رزّه ومزيون
وفي يدك ساعة تعطي الوان وأشكال=مطليّة بألماس ماهو زركون
وفـأصبعك خاتم فضة وفصه جلال=مغير يلمع كل ما قلت هاللون
وشماغ لولا حبكته قلت طربال=لا والله الطربال مع شكله يهون
وعقال من شافه حلف ماهو عقال=يقول هذا عقال وإلا درقسون
وثوبٍ مفصّل ماهو آيات تفصال=لو تلبسه عذرا غدا القلب مفتون
ماهو بثوب الدفة بمية ريال=خامة قماشه ألف وألفين عربون
وإن كنت فاضي يوم ماعندك أشغال=عليك باستديو زماني أو فنون
وطق لك صورة كايفه مالها أمثال=ويفضل إن إيدك على خدك تكون
وحاول تعرف لك على شخص محتال=إعلاميٍ مشهور ماهوب مدفون
بإمكانه يخليك في أيام وليال=مشهور مثل النابغة وابن خلدون
وحاول قبل كل شي تغريه بالمال=لين إنه بكبره يصير إلك مرهون
وأشيا كثيره غير هذي على البال=ياناس ياعالم هو أنتم تشوفون
موروثنا الشعبي غدا نصه خبال=بيدين متشدق ، وساذج ، ومجنون
من عقب ماكانت توارثه الأجيال=أصبح مجرد شي زايد ومركون
ومن عقب ماكان يتنفس ويختال=صار أوكسجينه ثاني أكسيد كربون
تعرضوه صوير وعوير والفال=للي على نهج الثنينه يسيرون
صوير جنب عوير وعوير دجال=وعوير جنب صوير وصوير ملسون
عوير لامن قال يالال يالال=صوير يصرخ ياخي ابداع وجنون
يامال فرقا العين يامال يامال=جنون يمكن لكن ابداع تبطون
وإليا سمع بيتٍ من بيوت الأبطال=فلنفرض إنه من بيوت ابن لعبون
عقّد حجاجه وانقلب جده هبال=وراحت علومه كلها دون في دون
وقال الحقيقة كل عصر له رجال=وحنا بعصر التلفزة والتليفون
لكن ويش الفرق يالغادي الضال=لكل عصر رجال والشعر مصيون
ماهوب عرضه للمهبل والأنذال=اللي ليا بانت نجومه يغيبون
نجومه اللي يستحقون الإجلال=أمثال : بندر ، والزلامي ، وابن عون
وابن سند ، والأكلبي ، وابن هذال=وبدر الحويفي ، والعسيلي يعدون
هذا مثال وباقي أمثال ، وأمثال=أسماً ذهب واصحابها ما يهونون
والشعر مهما صار باقي ولا زال=وشعّارنا في كل وادي يهيمون
ياكثرهم كثراه لا جت للأزال=وإن جات للشعر الحقيقي يقلون
مليون لكن لو تجيب إلك منخال=وتنخلهم بمنخال ماهم مليون
وأنا ما أبري نفسي بكل الأحوال=أخاف في المنخل مع اللي يطيحون
لكن والله ماني قصير حبال=ولاني من اللي في القوايل يضيعون
والشعر احبه حب مافيه مدخال=ماني وصي الشعر لكن مغبون
من ناسٍ تحاول تحيّل وتحتال=ناسٍ بحذف السين ، والألْف ، والنون
عمالقة واحدهم إن قال ماطال=فطاحلة وإن ْ جيت للحق ما لون
تحت مسمى الشعر يبنون الآمال=وآمالهم ياجعلهم ما يفيدون
صورة على غلاف المجلة بمدهال=وإلا حوار مطولٍ في التلفزون
وأعمالهم والله من شين الأعمال=هرجٍ يجيبونه وهرجٍ يودون
فلان قال ، وقال ، وفلان رجال=وفلان ماهو رجل وفلان دندون
أقول : ناولني من الكيف فنجال=ما عاد صدري يحتمل كثرة غبون
يقول ابن جدلان من عرض ما قال=تكفون صونوا كلمة الشعر تكفون
وأنا بقول اليوم عن كل الأقوال=هذا الصحيح وقولوا اللي تقولون

الشاعر / نايف بن معلا المغيري

.

[نايف مطلق بن مصيبيح]

صح السان الشاعر نايف المغيري

وسلمت يمينك على النقل

فعلاً هذا حال الشعر هذه الايام

[حافي حائل]

اخوي ناصر يسلموووووووووووو على النقل وصح لسان شاعرنا

[سعود الحـافي]

صح نبض الشاعر في منتهى الروعة


شكرا ياناصر على النقل

[ناصر الحافي]

يعطيكم العافيه على مروركم الكريم


دمتم بود,,

[مطلق الحنتوشي]

صح لسان الشاعر نايف معلا ومشكور يابو محمد كل الشكر

[ابن مشيب]

صح لسان الشاعر

والله يعطيك العافيه

على النقل تحيتى لك

[الروقي]

يسلمووو على النقل الرائع ومشكوررر أأخوى

[الملفي]

صح لسان الشاعر / نايف المغيري

وتسلم يمينك على النقل


تحياتي لكـ

[القوة الضاربة]

الله يعطيك العافيه