جديد الشــــاعر\كديميس صالح رداً على معجب المطيري

[الوليد الحافي]

نبي نحول للمحول حواله = وعدة نقاطٍ تحتها عدة حروف
مادام حطوا للمراسيل صاله = أجبت دعوتهم لجل عدة ظروف
وقصدي ومطلوبي تسود العداله = وكلٍ بدنيانا له اهداف وشفوف
وليا انفتح باب القصيد ومجاله = لابد مانسمع معانيه ونشوف
اما ادخل الصاله وكلٍ وفاله = ولا اتعدى يم الاقصين واطوف
الرجل تعرف قدرته واحتماله = لا صارفي الميدان طايف ومطيوف
وصلت لنا من عند معجب رساله = من محتواها عنصر الصدق محذوف
الله يجنبنا طريق الضلاله = اليا جرف تيارها كل ملقوف
ملقوف ينشر ماتخيل اباله = وعلى الهزيل من الحكي تقل مدفوف
اليا راوده شيطانها واستماله = روح على طق العصا يضرب دفوف
رسالته عبر بها عن خياله = بدون اساس وسطحها غير مسقوف
فيها كلام يفتقر للجزاله = تمجه اسماع العرب غير مالوف
جمّع من الحكي المزيف هزاله = حيث ان اله عنده ملفات ورفوف
واصبح لجماع الدوادي زماله = وركب قعودٍ يلحق القوم مردوف
وليا حثل ماني براعي حثاله = بملوث الأقوال ماني بمكلوف
لي منهجٍ نجس النبا مايناله = عالي على الهابط على راس شفشوف
ويمدح مطير ويدعي في مقاله = مجد ٍلمطرانه على مطير موقوف
وده يمارينا وذا من هباله = الفرق واضح عند الأمه ومعروف
يدرون عن قوم الحيل والحباله = اللي مخططهم مشاهد ومكشوف
اللي ليا ركب الرشا في المحاله = يطلع سهمهم بعد الأحداث مشلوف
ويدرون عن قوم الوفا والجماله = للجار واللي مستجيرين واظيوف
اللي لهم في نجد قاله واصاله = وعن مستوى بعض القبايل بهم نوف
حنا عتيبه في الأمور الجلاله = عوق الخصيم مزبنة كل ملهوف
حصن ٍ حصين يزبّن اللي لجا له = بيوتنا للملتجي درع وكهوف
ينزل ضعنا ما نقدم نزاله = لو كان بأفواج الحفيفين محفوف
وليا عوا ذيب ٍ لذيب وعوا له = ومن كل صوب ٍ في الوطن هب عاصوف
ليا هاجت الامواج فينا ثقاله = لو هاجمونا القوم طوف ٍ ورا طوف
ليامن سوق الحرب سيقت جماله = سقنا جملنا بين ميات والوف
وليا مشى جمع ٍ لجمع ومشى له = رماحنا في المعركه تاصل الجوف
صديق عينك مانجي في حياله = ليا جاء نهارٍ فيه قاصف ومقصوف
وليا تمادى المدعي في جداله = عندي عن الماضي ملفات وكشوف
مصادر التاريخ عين الدلاله = لمن كان عنده سمع وعيون ٍ تشوف
مناخ عرجا قد حصدتوا وباله = مسجله نتايجه وسط مظروف
فيصل بجو مغيب نزل رحاله = وارسل سبوره تبرح الدار وتحوف
وغابوا عنه مقدار يومٍ ولاله = وجابوا له الأخبار بالسمع والشوف
وقالو له العتبان بأرض ٍ زلاله = أرض ٍ فياح ٍ بس عبله وقفقوف
وبواد الرشا واللي جنوب وشماله = ومعهم من الحافر كراديس ٍ وقوف
وعلق على جمع الحروب اتكاله = وابن العويرى وصّف الشيخ شاحوف
بالمدح في الألقاب حطه وشاله = حتى غدا ريش اشقر الريش منتوف
وبعد المواجه بالفشق واشتغاله = ضاعت وصوف اللي على الحر موصوف
وقفا عن الديره سريع ارتحاله = وترك على الساقه مساكين وضعوف
وكل ٍ بلش عند التوالي بحاله = وتخيروا ماقال مزيد لمقطوف
ودا ورد جعل الوبل يسقي ا سهاله = حيث الثلاثه جمعوا بأرضه صفوف
وتحالفوا ضد العتيبي لحاله = ناوين ينفونه من الدار بالكوف
وعقب المواجه بانت الإستحاله = وتمزع الجمع الذي كان مصفوف
عقب استمر الحرب وابطت لياله = واحد ثبت واثنين خفوا من الخوف
راحت فهود مطير مثل الثعاله = والحر منهم قدمنا صار خاطوف
ولجى الأمير لحيلته واحتياله = وسرى بتالي الليل ماهوب مشيوف
شب الشعار ونار فوق الخياله = وخان الحليف اللي فعل فيه معروف
ربط كلابه ثم تقفى حلاله = وسلك طريق ٍ قبل مسراه معيوف
وقع ولد باقان صك الإزاله = واصبح ذراعه عن هقاويه مكفوف
وحرب الرشاويه وكيف اجتواله = مناخ لا غارات خاطف ومخطوف
عشرين يوم ٍ مستمر ٍقتاله = وهذا يجيب الملح والثاني يدوف
حنا هل المنهل وحامين جاله = محد ٍ يجيه الا بمنه ومعروف
وجانا دويش مطير فيه استطاله = ومن حرب وافواج القحاطين مكنوف
طمعان في واد الرشا واحتلاله = لكن واجه خيل ورجال وسيوف
ولابرّق الا عقب شاهد رجاله = البعض مقتولين والبعض مكتوف
وبدل دويش مطير حاله بحاله = وصار الصعب عقب المناويخ معسوف
وعقب العواجه صار فيه اعتداله = ورمح الطراد اللي معه صار معكوف
حبالنا طالت وقصرت حباله = وفارق قرارت نجد بالكوف بالكوف
كم فارس ٍ منكم سريع انفعاله = لاياشاف دقلات الرمك تقل مشعوف
انشد عنه ذيب جبله وين شاله = ومن قلطه للذيب بدماه ملحوف
كم مرة ٍ صاروا شيوخك فواله = لسيوفنا فوق النضى وام سرجوف
وسلطان اخذنا عبدته مع دلاله = اللي ملبسها مجزع ونفنوف
وخذنا كحيلين عريضن ظلاله = بيت الأمير اللي كما رجم ذايوف
فوق البعير اللي من اطيب جماله = وتسعين فارس باحدب السيف مجعوف
فوق العويند جعل تسقى تلاله = عد الجهام اللي من الصيف مصيوف
وفندي ذكر ماصار بعد احتفاله = بعيد انتصار جموعنا وارسل زروف
يم الذويبي فوق نضو نعنا له = خبر من الشاعر اليا الشيخ مزفوف
حيثه رفض دعوة دويش ٍ شكى له = مكتوب ابن وطبان يضربه الطوف
اما مناخ الضال يالك ويا له = مصوره مخلد وسهاج بوصوف
تقول صوّره المصوربلاله = يوم الجثث ماغير الأبدان وكتوف
حصلكم هاك النهار انجداله = يوم الرصاص من البواريد مقذوف
رحتوا كما صيد ٍتزايد اجفاله = وخليتوا اللي كنهن شرد خشوف
امست عطفكم عندنا بالكفاله = ولاحد ٍ كشف عنهن غطىٍ كان ملفوف
ندري ان من يكسب سبيه حلاله = لكن شيمه واحترام ٍ ومعروف
وطلال صاب مطير فيه انخذاله = عقب سمك عج الرمك كنه قنوف
غادرتوا الميدان عقب اشتعاله = واصبح عليكم معطف الخوف معطوف
محد ٍ يلد لصوت عمه وخاله = نسيتوا النجده ومسعف ومسعوف
وحرب الحوّر نايف تكبد نكاله = وبريه عقبه بدرها صار مكسوف
عقب المناخ اللي ربح من سعى له = وخسر المقيم وغادر الدار مندوف
احد ٍ حدر سمحان ينقل عياله = واحد ٍ حديناهم على راس شنظوف
وعقبه نزلتوا رس مدري ثماله = دايم بمغرف يابس الكبد مغروف
وعلوا عطونا محضر الإستقاله = ومحضر بني واصل مصدق ومضيوف
وهفوا مثل نوّن تمزع خياله = وكاس المذله بينهم صار منصوف
فالحرب حنا هل الصبر في الإطاله = نلطم ونوف وبعدها نطعن دفوف
لكن من تغلب عليه الجهاله = يقول ابحذف كلمة ٍ يمكن تطوف
اليا قال شيطانه قل العلم قاله = وحطه ورا بعض العرب يلقط قطوف
ولو قال مهما قال ماني بحاله = تبقى الكوايا لو نبت فوقها الصوف
مخلف هزم خمسين فارس لحاله = وجاب الأصايل عقب وراهم الحوف
لو شفت حمران النواظر قباله = الكل منهم للمنع يرفع كفوف
وقبر الصييفي له عليكم جماله = يوم الرصاص يلوف طابوركم لوف
ضحوا لمنقذكم من اهل الشكا له = لجله عفوا عنكم وقالوا بهذلوف
وقصيرنا منكم ليا جاء زواله = وصار السبب منا تهيت له صدوف
من ربعنا نذبح ثلاثه بداله = ونرعى عياله بالحمايه ومصروف
وخوينا لو بار نرفا خماله = مايلحقه منا تخاليف وحفوف
وقصيركم منا جرا له جراله = امسى ولا اصبح صار للجار صادوف
امسى معافا في عياله وماله = واصبح عليه مصلفح اللبن مرصوف
وخويكم يامطير تم اغتياله = من عقب عشاكم عشى ٍغير مخلوف
والضيف ماسر التناول نواله = ذكي ذكاه وملحة مطير في الجوف
احد ٍ ذبحتوا عمد واحد ٍ ختاله = واحد ٍ حذف للذيب وثنين بل جوف
وذا منتهى واقصى حدود النذاله = لكن في مفهومكم مابها حوف
من مات يكتب للخليفه وكاله = يورثه عرف ٍ عن الحق محروف
من العِشر حتى المنتهى بالكلاله = كل ٍ من الترثه لبس ثوب مقلوف
هذا الجواب لجانب ٍ من سؤاله = وعلى اليسار اللي بقى منه منسوف
مايستويلي منهجه واستوى له = لوكان مليان ٍ دغاليب وجلوف

[مرزوق الحافي]

كديمس بن صالح العصيمي العتيبي






شاعر قل نظيره في هذا الوقت فهو يمتلك طاقات شعريه خارقه للعاده تجعل منه وسيله اعلاميه مؤثره ومرجحه لميزان تعادلت كفتاه
ويمتازباجادته لجميع أغراض الشعر فالمديح والرثاء والفخر والهجــــــــــــــــاء
وهو غالباً مايصيب مبتغاه في مقتل وايضاً بارع في تخريم اذاني الخصم
وهذا مما اعجز اغلب الشعراء عن مواجهته فشاعرنا كديميس استطاع ان يتصدى لسبعين شاعر من قبيله واحده لوحده واعجزهم جميعاً وهذا التصدي الذي قام به هو من باب الولاء والحب المترسخ في اعماقه لقبيلته
صح لسان الشاعر الكبير/ كديميس العصيمي

وبيض الله وجهه وغير مستغرب منه الرد في مثل هالمواقف

فهذا الشيء الذي اعتاده الجميع من كديميس العصيمي

من غير قصور في باقي شعراء القبيلة
ولاهنت ياالوليدالحافي

وبيض الله وجهك على الطرح

[نايف بن مزيد]

الوليد الحااافي.........
مشكور........على النقل..

[ناصر بن سعود]

صح لسان الشاعر

ولاهنت يالوليد

يعطيك العافية

تحيتي

[البرق الخاطف]

الوليد

يعطيك العافيه

[ذعارالتوم]

الوليد الحااافي.........
مشكور........

[مطلق الحنتوشي]

صح لسان الشاعر الكبير بشعره (شاعري المفضل) كديميس بن صالح العصيمي على هذه الشامخه ولاهنت يالوليد

[ابن مشيب]

صح لسان الشاعر

والله يعطيك العافيه

على النقل تحيتى لك

[الذيب]

صـــــــح لسانه

لاهنت,,

[الزلزال]

الوليد الحافي بيض الله وجهك وصح لسان الشاعر الكبير كديميس وطول الله عمرة