الصاحب الوافي من الناس لاباس لو باعته كل المخاليق نشريه (مسجات خوه)

[ذيب روق]

تربطني الخوة بروس المطاليق ** ربط الاخوه غير ربط العلاقه
واصعد برفقتهم على قمه طويق ** واصد عن راعي النفاق ونفاقه
وانا اشهد ان الطيب هبه وتوفيق ** ماهو بعقد يبرمون اتفاقه
وانتم من اللي ساكنين المعاليق ** ومن مثلكم مكسب وشوفه شفاقه



راس مالي من هل الطيب خوه واحترام ** خوتن يلزم هل الطيب افعالها
خوة الوافين تبقى على صدري وسام ** الرجال اللي على الطيب ساس اعمالها
قالها اللي يعشق الطيب واصحاب المقام ** مثل ماقال المثل للحمول اجمالها
شرواااااااااك



لاغدا للمدح من بين خلق الله مجال ** والرجال اتعد فعل الرجال وطيبها
قلت انا لي صاحب ثابت مثل الجبال ** والعلوم الطيبه كلها يحريبها
من رجال تلطم الضد وتعز الرجال ** يوم مظلمت الليالي يصوّت ذيبها



احب الرفقه اللي مابها حاسد ومحسود ** واحب الصاحب الي صحبته ماهو بجالبها
يداري خاطر الثاني ولا يقبل عليه الزود ** على يمناه دايم رفقته ماخان واجبها
وسيع المعرفه لاهو بجاحد ولا مجحود ** قوي الباس ماياخذ على الرفقه ضرايبها



الجود شيخن تملكه عدة اطراف ** بس المراجل حالف انك ولدها
عريب جد وحاوين كل الاعراب ** دنياك جنة بس فعلك رغدها
كل العلوم الطيبه عندك اهداف ** صارت فريسه وانت كنك اسدها



السنين القشر تخلف هقاوي من هقا ** والدهر مركز تجارب وميدان فسيح
وش بقا ماعلمتنا الليالي وش بقا ** كل يوم درس بسلوب ولسان فصيح
ياهل المعروف كل شقا باللي لقا ** والحظيظ اللي من الهم قلبه مستريح
بين لحظات المفارق ولحظات اللقى ** تتضح لك صورة الود بالمعنى الصريح
زبدة الخافي تبين ليا خض السقا ** والصدور اللي بها شر يفضحها الكحيح
صحبة ماهيب تبنى على عز ونقا ** اخرتها لو تطول مبانيها تطيح
الموفق من تخير صديقه وانتقا ** صاحبن قلبه سليم ومنهاجه سميح
شروااااك



بعض البشر شرواك ينحط عالراس ** مثل العقال مثبته فوق راسي
في خوته لاقي معّزه ونوماس **وافخر بفعله بين ربعي وناسي
القاه جنبي دوم لا احتجت للناس ** عز الله ان القرم يجلى عماسي



الصاحب الوافي من الناس لاباس ** لو باعته كل المخاليق نشريه
حقه ومن حقه نشيله على الراس ** ونمشي على كيفه ونتبع طواريه
وان حدته سود الليالي والاتعاس ** حنا سند راسه وحنا عزاويه



لك وسط قلبي شيوخ وقبايل ** يمشون تحت امرك على مابغيته
اضرب بهم ضلع الجبل ويتمايل ** واقطع بهم عرض البحر لانويته



مايعن الراس ويسوق القدم ** الا مسيرن فوق روس الطايله
على ضعيف الراس مافاد الزهم ** لو تزهمه بسمه وبسم العايله
واليا فعلنا الطيب رفرف ياعلم ** هذيك وقعاته وذي دلايله
عليك امان الله ومد أم الشحم **اني حزامك في الليالي المايله
منحرين البل وعدوان الغنم ** سكينهم من كل حمرن سايله
أحدن ليا طروه قالوا به نعم ** واحدن لاقيل اسمه يفشل قايله
الكفو شرواك له في هاتفي اسم ** والاش مالي رقم في موبايله



خاويت ذيب يرفع الراس ماخاف ** سبع السباع اللي بعيد مددها
نسل الشيوخ اللي تنقل بالاوصاف ** اوصاف طيبه ماحصينا عددها
خذها عهد خوة شرف يابن الاشراف ** ماتنتهي لين انتهي في لحدها



تسلم وتبقى للشرف رافع الراس ** يافرحة المظلوم ساعة كدرها
شوفك وذكرك للرجاجيل نوماس ** اللي يعرفون الامور وخبرها
من حبه الله سخر لحبه الناس ** والله يخص بنعمته من شكرها



ارقى سنود ولايجي في خاطرك شين ** واترك هواجيس الزمن في حريقه
خلك رجل مايلتفت يااحمر العين ** ينطح صواديف الزمن ماتعيقه
حتى ولو صارت همومك ملايين ** مابه شقى كود الفرج في طريقه



اشتري خوة رفيقن مشتريني ** صاحبي وقت الشدايد ينتخابه
وافي في خوته نعم العويني ** مسندن بالضيق قرم يعتزابه
الرفيق اللي له افعال تبيني ** بالمراجل معتلي كنه سحابه
الكريم الحاتمي ذرب اليميني ** الشجاع اللي عدوانه تهابه



يا طير ياللي راسلك صادق الود ** ثن السلام وحب راسه وخشمه
قله ترا له حشمة مالها حد ** حشمة عليل فاقد اليوم خله
وقله ترا حالي من البعد منلد ** لدة كريم فاقد كل حله
وقله ترا لك صاحبن مابعد صد ** يفداك في روحه وماله وكله


الناس بالدنيا تواريخ وارقام ** احباب واصحاب ومعارف وخلان
وانته بقلبي جامع الاربع اقسام ** وقدرك بقلبي دايم الدوم ماهان



ابطيت عن ربع المروات والجود ** الطيبين اهل الوفى والكرامه
سلام دايم ينثر المسك والعود ** ينصى الرفيق اللي فقدنا سلامه
مافيك ياليث الرجاجيل منقود ** الا السماحه والندى والشهامه
مادام راسك تلفحه هبة النود ** فالحمد لله خصني باحترامه

[ابن مسهر]

لاهنت يالذيب

وبيض الله وجهك

[[.. البدر ..]]

ذيب روق


كلها ابيات موفقه

بارك الله فيك

[الملفي]

ذيب روق

لاهنت على الاختيار الموفق

وبيض الله وجهك

تحياتي لك

[شمالي]

ذيب روق


ماقصرت يالغالي

[البرق الخاطف]

ذيب روق

ابيات رائعه جدا

يعطيك العافيه على الاختيار الاكثر من رائع

[أبوريشه الحافي]

لا هنت يعطيــــــك العافيـــــــه

وتسلـــــــم رعاك الله ..

[الروقي]

الله يعطيك العافية

ولاهنت

على هذا الموضوع

[ذيب روق]

يا هلا و غلا

تشرفت بمروركم

[ذعارالتوم]

ذيب روق




بعض البشر شرواك ينحط عالراس ** مثل العقال مثبته فوق راسي
في خوته لاقي معّزه ونوماس **وافخر بفعله بين ربعي وناسي
القاه جنبي دوم لا احتجت للناس ** عز الله ان القرم يجلى عماسي


بيض اللــــــــــه وجهك اختيار موفق