الوقت ياناصر معقد ومثبور

[ناصر الحافي]

السلام عليكم ورحمة الله وبركاته


مساجلة شعرية



هذه قصيده موجهه لي من الشاعر القدير بندر بن بدر الحافي

\
/
\
.
.

الوقت ياناصر معقد ومثبور = والجو يابن العم ماهوب صافي
وقد قالها قبلي ترا بندر سرور= جا في عواصيف الرياح اختلافي
وايضا من الحكمه اله قاف مشهور = دايم ومرقد ميت النار دافي
وقتاً تحط به المسامه على الثور = وشعيل يمشي وتايهاً فالفيافي
وبيت الشعر عقب المداهيل مهجور = عليه يذري يابن الاجواد سافي
والبارحه يوم السما ودع النور = والنور راح وحظرة الليل لافي
ولعت بيوت الشعر وبليس مدحور = قافي وانا اتهيض لياشلت قافي
قافاً قوي للسبك والحبك معمور = عليه من بندر وصقر النصافي
ماهوب قافاً ضايع الوزن مدمور = قافاً يردد بين واشي وهافي
البحر يرسي به سفينه وبابور = والذل قسماً للقلوب السخافي
ماجور تال الوقت يالشعر ماجور = ماجور من جور السنين العجافي
من قد ابو فيصل حبيب ومستور = وقدامهم مطلق وصياف (وافي)
اليوم كلاً معه سبحه وباكور = وان شفت شكله قلت وش هالسنافي
وليا وقف وليا جلس حيل مغرور = وان مد زلقومه ياربي ياكافي
لو تلمزه فالبيت وتقول ياثور = مايدري هو معناك ساعي وطافي
هذ الشعر فالرد وفي نظمها يخور = قصيدتاً فيها البلا والخلافي
بيتاً ركيك وبيت فالوزن مكسور = واسهم مكيرش ماتباعد مصافي
ويبي يزينها بنطقاً ومعثور = ولا حراكاتاً وفيها احترافي
ينفض يدينه تقل شخص مسحور = والستر زين ان صار وافي وضافي
ناساً ومعها واسطه تطمر الدور = وناساً بليا واسطه ماتشافي
لكن وانا بن بدر محٌكم الشور = الله ولا بعض النفوس الضعافي

.................................................. ..........


\
/
\
.
.

رديت عليه بهذه :

قم ياقصيدي وجب الشعر بالفور = دامه لفا والنور ماهوب طافي
من شاعراً شامخ كما ضلع ابا القور = بندر بدر والجد معروف حافي
من لابةً ينخا بها كل مقهور = اهل القنا والطيب واهل العطافي
فالشعر اله خبره ومبدا ودستور = مشهود له لو كان ماجا اعترافي
جاب الحقايق واظهر الكذب والزور = واظهر كريم العين ماكان خافي
هيض مشاعر كلها حس وشعور = وارخت سدول الليل جزل القوافي
كز البيوت وصفها صف طابور = واحد من حد السيوف الرهافي
ومادام يابندر بقا شخص منعور= في علة الأشعار للشعر شافي
امثال ابن قضعان ضيدان منصور = وامثال ابن جدلان والقرم لافي
ويبقى الزلامي فالداووين هامور= وأبن زويبن جاب زين القطافي
ناساً بنات افكارهم كنها الحور = هذا الصحيح ولا عليه اختلافي
اللي بنوا فالشعر هامات وقصور = والحمد لله يا صحيبي عوافي
مابين حبك وسبك وابداع مخبور = والبيت جنب البيت مثل الولافي
حطوا على القيفان مثل الحما سور = في وقت صار الشعر يالقرم غافي
في وقت غنابه ثلاثين بربور = والبن هذا الوقت مشروب كافي
الكل منهم وده يصير مشهور = فاية مجله صورته فالغلافي
حتى قناة الشعر ماتمنع العور = والبعض منهم يالسنافي كفافي
أقر اللذي في ساحة الشعر منشور = بين الحقيقه والحقيقه تنافي
باقي كلامً ودك يصير محظور = واللي شرحته يا ابيض الوجه كافي
معذور يابن العم بالفعل معذور = والحق مثل النور ماهو بطافي
وختامها دام القلم وانت مشكور = دامت حياتك والسنين المقافي

ناصر بن محمد الحافي

[ناصر بن سعود]

حجــــــــــز ( 1 )

لي عودة بعد قرائتها

[الذيب]

صــــح لسانه بندر الحافي..

وصح لسانك ياناصر

مبدعين..

كلكم على راسي ونفتخر فيكم..

لاهنتم..

[ناصر بن سعود]

الله الله

مبدعين بحق الله يحفظكم ويرعاكم

صح لسانك يابو محمد وصح لسان بندر

جزلين الله لايهينكم

ونتطلع لمساجلات قادمة

دمت كما انت

[ناصر الحافي]

ذيب شعر - الذيب

صحت أبدانكم واشكر لكم هذا التواجد والله لايهينكم


مروركم شرف ووسام على صدري

[ابن مشيب]

صح السنتكم يالشاعرين

وبنتظار القادم تحيتى لكم

[مطلق الحنتوشي]

صح لسانك ياشاعرنا / ناصر الحافي وصح لسان الشاعر بندر






سجل اعجابي بكل ماتعنيه الكلمه ولاتحرمنا جديدك ....

[ابن وافي]

صح لسانك يا ناصر


ولسان الشاعر بندر






مودتي ،،،،،

[بدر الحافي]

صحت السنتكم


والله يعافيكم ويطول عماركم

[ღ السندريــلا ღ]

صح لسانك على المساجله شاعرنا ..