[ اهداء ] معركه سناف الطراد

[ابن مشيب]

قال أبو عبدالرحمن بن عقيل : في كتابه ديوان الشعر العامي بلهجة أهل نجد
روينا عن كتاب صحيح الاخبار لابن بليهد يرحمه الله قال حدثني عثمان الهاجري أمام مسجد محمد بن هادي بن قرمله قال كنا مقيمين
في فيضة وادي أراط في العتك أيام الربيع فجاء في يوم واحد خمس من الخيل هدايا كل فرس واحده مع وفد يطلبون الجوار والامتداد في نجد .

قال عبدالرحمن : وهكذا كانت سيطرة قحطان على براري نجد . وقال الهاجري وكنا عند المضباعه أيام الربيع فجاء تركي بن حميد وأناخ عند أبن هادي يطلب الجوار روينا عن أبن بليهد يرحمه الله في صحيح
الاخبار : حدثني فراج بن طويق الحافي : كنا مع سلطان بن ربيعان _ شيخ الروقه_ في حوى كشف واتينا ابن هادي على ماء الشعراء ومعنا جيش وخيل وهدايا نطلب منه الجوار فقال لنا : انتم في وجهي
ارعوا حيث شئتم الا جبل النير : من دخله فهو خارج عن الامان .

قال ابن بليهد : وظني ان هذا الاعرابي يخشى ان يدخلوا الجبل فلا يخرجوا منه

ولكن ابن بليهد يذكر ان ابن هادي اختلف مع عتيبه وكانوا يخرجون انذاك من تهامه والحجاز كأرجال الجراد ومن استوطن نجد لم يرجع .. وكان رئيس برقا تركي بن حميد ورئيس الروقه سلطان بن ربيعان
وكان تركي بن حميد رئيس عتيبة في معاركها مع قحطان .

ومن المعارك التي خاضتها عتيبة بزعامة تركي بن حميد معركة وقعة سنة 1269هـ ,ضد ابن هادي وجماعته , وكان النصر لعتيبه . بوادي الشعراء قال ابن بليهد : وفي ذلك الموضع سناف يسمى اليوم
سناف الطراد لعظم تطارد الخيل فيه ولم يسمى بهذا الاسم الا بعد تلك المعركة .

وفي اول عهد تركي كان يقيم مع جزء كبير من( عتيبة ) في الحجاز واذا طاح الربيع طلبوا الجوار من محمد بن هادي شيخ قحطان في نجد وربما من والده هادي مدة الربيع واذا انتهى الربيع عادوا الى الحجاز
وفي احدى السنوات لم تمطر السماء الا متاخرة فارسلت عتيبة هداياها الى ابن قرمله ورحلت متوجهة الى نجد حتى توغلت الى قرب سجا وحينما قدمت الهدايا سأل أبن هادي المندوبين أين عتيبة؟؟

فقيل له عن موضعهم فغضب ورفض الهدايا وطلب عودة القبيلة الى الحجاز ومن ثم أرسال الهدايا وطلب الجوار ..عز ذلك على تركي وركب بنفسه وذهب الى ابن قرمله .
(وعندما وصل الشيخ تركي للشيخ محمد بن هادي اذا بزوجة الشيخ محمد واقفه خلف ارواق البيت وشاهدت الشيخ تركي عندما دخل على بن هادي )وعندما خرج الشيخ تركي دخلت زوجة الشيخ محمد
فقالت له وراك ماعطيت بن حميد مطلوبة فقال اعجبك فقالت لا لكن الرجال جاك تسحب جوخته ثم قام من عندك جوخته الى نصف ساقه والله انه يصحبك بالخيل

وحينما عاد الى قومه اجتمع اليه امراء القبيله وتشاور معاهم وكان الراي الاخير هو الحرب فأرسل الشيخ تركي واحد من فرسان عتيبة للشيخ ابن هادي وحمله هالقصيده وهي رد نقا وتبليغ بالحرب

ياراكبـن مـن فـوق بواجـة الخـلا=من البقل ما بانت مـواري فطورهـا
زعولن من الراكب جزوعن من العصا=خطـر علـى فزاتهـا قصـم كورهـا
ركابهـا مــن ربعـنـا خابريـنـه=دليلـة الظلمـا إليـا غـاب نورهـا
انص (ابن هادي) ريف هشالة الخـلا=ريف الهجافا فـي ليالـي عسورهـا
في مجلسه تلقـى علومـن طرايـف=وحيـل تطاهـا كـل يـوم قـدورهـا
قل له طلبنا الصلح منكـم ولا حصـل=دنيـاك مايبقـى بهـا الا صبـورهـا
وترى الحرب سقم العين ماهو بـراحه=تسهر ويقزي نومها عـن حجورهـا
وإليـا حربتـونـا فحـنـا حريـبـه=ماحـن بشيـان قصـارن شبـورهـا
تضدوننـا بالكثـر ، وحنـا نضدكـم=بأكـوان منـا مـا تجبـر كسورهـا
نقفـي وحنـا عيننـا فـي حريبـنـا=نعقب لهـم نمـرا تعاقـب سبورهـا
ونـرد سرحـات الخلايـع مشـايـع=كبـار القفايـر نابيـات ظهـورهـا
إمـا نوافـق غـرة تتـفـق لـنـا=والا مقابـيـس تقـسـم شـرورهـا
يرجـا لفزعتنـا إليـا جـاء كميننـا=بدهم الفرنج اللي وساعـن قرورهـا
كرامـة لـلـي تـشـوق لحربـنـا=لـو انتحـوا عنـا بعيـدن نزورهـا
ومـا أذمكـم ياربعنـا نعمـن بـكـم=انتم سبـاع الهيـش وحنـا نمورهـا
وانتم كما ضلعن صبور علـى الشقـا=وحنا حـرار فـي مشاذيـب قورهـا
ساعـة تجيكـم خيلـنـا عارفينـهـا=معاريـض والا معطيتكـم نحـورهـا
وساعـة تجينـا خيلكـم عارفينـهـا=نحد السبايـا ليـن تركـب وعورهـا
كـم سربتـن دهمـا دهـوم نجرهـا=تحاكوا بهـا غيابهـا مـع حضورهـا
إليـا نسيتـوهـا عليـكـم نجـرهـا=تموتون وانتـم مانسيتـوا حرورهـا
تصبح مداس الخيل من غـب كوننـا=تشبـع حناديهـا وباقـي نسـورهـا
ماينفـع الا الصـدق والفعـل والنقـا=وباقـي الحكايـا بايهـات أمـورهـا
عاداتنا لطـم المعـادي علـى النقـا=والا العميـلـة راتـعـه مانـذورهـا

فكان رد الشيخ محمد

ياتركي ابن حميد وان كنت صادق=فارجع بقومـك لاتولّـي دبورهـا
نجد(ن)تبرّا منـك وبنـا ترحـب=تبدي لك البغضا ولا طعت شورها
فإن كان يا بن حميد ماطعت ناصح=ترى الوعد لا من ركبنا ظهورهـا
فإن كان جمعاكم خذت ثوب راعي=فتر جمعنـا ماياخـذ الإ ندورهـا
بني مظيم(ن)وان تولوك ساعـة=يشدي ليوم الحشر نفخات صورها
عاداتنا لطم المعادي علـى القنـا=والإ العميلـة راتعـة ماندورهـا

ثم انشد الشيخ تركي هذه القصيده موجهها للشيخ سلطان بن ربيعان والهيضل

نومك طرب وأنا نومـي هواجيـس=ماساهـرك بالليـل كثـر همـومـي
أسهر الانامـت عيـون الهداريـس=بالليل أساهـر ساهـرات النجومـي
أوجس بقلبي مثـل دق النحاحيـس=الله يلـوم اللـي لمثـلـي يلـومـي
أشـوف عـدلات الليالـي مقابيـس=ولاحد من الدنيـا عظامـه سلومـي
تضحك وتخفيلـك حفـي الهناديـس=تفطـر لهـا يـوم ويـوم تصومـي
أعمل وتلقى وأفهـم العلـم بالقيـس=دنيـاك لـو زانـت تراهـا نقومـي
قالوا جهلت وقلـت جهـل بلاقيـس=الجاهـل اللـي مايعـرف اليمومـي
من لايدوس الراي من قبل ماديـس=عليـه داسـوه العيـال القـرومـي
ومن لايقلط شذرة السيـف والكيـس=تبدي عليـه مـن الليالـي ثلومـي
ومن لاياخذ الدنيـا بميـز وتقييـس=مثل الـذي يسبحـر بحـر يعومـي
القصر مايصلح على غيـر يأسيـس=ومـن لاتعلـم ماتسـر العلـومـي
واليا توافق مشى ورى السو وأبليس=تـدر منـه وستـر ربـك يدومـي
كل القلـم مـن كتبنـا بالقراطيـس=واركابنـا مـن كثـر الاذلاج تومـي
ولاخير في كثـر الحكـا والتماليـس=هـرج بلافعـل يجيـبـه وهـومـي
والعز فوق معسكـرات السواديـس=اليا قصدت اللـي بالاشيـا رحومـي
قـب تنـازا بالنشـامـا كـراديـس=والطيـر فـي روجاتهـن يحومـي
بالليل أصالـي حاميـات المحاميـس=والصبح أصالي كـل قـب قحومـي
أربع سنين ودمـع عينـي أماريـس=العين تسهـر كـن فيهـا هزومـي
واليا ركبـت معالجـات المضاريـس=يبرد علـى قلبـي لهيبـه سمومـي
صوابنا بالميـل عمـق اليـا قيـس=وطريحنـا فـي مثبـره مايقـومـي
ان جن بنا مثـل النعـام الاماريـس=لاخف عقل مـع رقـاق الحزومـي
استلحق اللـي يطلبـون النواميـس=اللي من الاقصيـن وادنـا اللحومـي
وان جن بالميدان مثـل الدواويـس=وتعاقبـوا مـن فوقهـن السهومـي
عـرج باهلهـن كنهـن القرانيـس=على الطريـح مصوبراتـن كظومـي
لومي على اللي ينقلـون العبابيـس=واهل الفرنج وكـل رامـي لحومـي
وشلفن تركب بالعـروق المناسيـس=وقحص المهار وكـل قـب قحومـي
واليا سمك عج الرمـك بالملابيـس=المسعد اللـي حـظ ربعـه يقومـي
الشيخ من يعطي الفقارى المفاليـس=يبـدل السـاعـة بـعـز يقـومـي
والحر ليـا دبـت عليـه النواميـس=يشهر وعـن دار المذلـة يشومـي
واليا اكترب من بعض الاشيا نسانيس=اعزمـوا لابـد الفـرج بالعزومـي
ثوب الشرف لبسه نظيف الملابيـس=ينجيـك باليـام الكـرب والزحومـي
يجلي صدا قلبي ضبيـح المهاريـس=لي قـام شـراب القهـاوي يعومـي
والدلال فوق النـار دايـم مجاليـس=اكرامـه حــق عليـنـا لـزومـي
من صنعة الصبة وخمسة تخاميـس=ذريـة يعمـل بهـا كــل يـومـي
وبهارهـن هيـل بليـا حواسـيـس=كيـف يعـدى للنشامـا القـرومـي
عـده لحمـاي العيـاد المـراويـس=ولا الحصان اللـي بقينـه وهومـي
حتى يطب لنـا المثـل والتوانيـس=والكيف طاب لمـن يفـك القحومـي
وصلاة ربي عـد رمـل الطعاميـس=على شفيع الخلـق يـوم اللمومـي
عـد البنـات وعـد ذار الطعاميـس=واعداد مايمطـر سحـاب الغيومـي

فكانت اولى الغارات التي شنها تركي على خيل ابن هادي
واخذ الكثير من الخيل ثم أقاموا الصلح بين الطرفين على ان يحترم كل منهم الجوار ويأدي كل منهم مايفقد من الاخر من خيل وابل

وفي نهاية المرباع فقد قحطان
اربعا من الخيل واخذ قعود عتيبي يدعى زبن

قيل انه اخذ من المناديب الذين ارسلوا في اول الوقت فأدى تركي خيل قحطان ولم يأدي ابن هادي قعود زبن فاغضب ذلك تركي وقال

يازبن كرب فـوق مايطـرد النـوم=حرايـر يازبـن مـثـل الاهـلـه
مرباعهـم مابيـن ظلـم والكمـوم=ومـن السفيـف يرمحـن الاظلـه
ملفاك شيخ بالقسـا يذبـح الكـوم=شيـخ وشيخـان القبايـل تـدلـه
تلقى محمد زبن من جـاه مضيـوم=زبن الذليـل اللـي مخيـف محلـه
وليا لفيت الشيـخ يازبـن ملـزوم=تعطيه مرسوم في وسطـه سجلـه
وان كان جيت النضو يازبن ماسوم=رد الخبـر والنضـو يازبـن خلـه
جانا من الشايب مكاتيـب وعلـوم=حي الكتاب اللي لفـا حشمـة لـه
الشايب اللي ينقـل الكبـر والـزوم=باغي لحكمي مير انا عاصـي لـه
الله يغشـك يـوم غشيتنـا اليـوم=تقـرا الكتـاب ولا تهـاب المظلـه
جزاك من عندي من الخيل حثلـوم=مثل البـرد مـن مزنـة مستهلـه
ان كان تذكر سابق لك مـن اليـوم=فـرس عتيبـي ورد شاهـد لــه
انا رمحـي بـاول الخيـل ملحـوم=والا انت رمحك عند سـاره تشلـه
اديت انا اربع قحص والخامس التوم=بقعود زبن اللـي بغـي ماحصلـه
والحرب شب وشبشبه كل شغمـوم=من شبته ملح الفرنجي عصـا لـه
اعرف ترى من طاح ماهوب مرحوم=اكود مـن رب المـلا شافـع لـه
شافي وجرمان غدوا بـاول القـوم=خلوا امطوعهـم وانـا شاهـد لـه
خلوا مطوعهم على غوجـة التـوم=وعزي لمن حط الردي مسنـد لـه
وانتم كما حوت على الشط لاهـوم=وحنـا اخلقنـا للواهـيـم عـلـه
وانتم كما ضلـع طويـل ومزمـوم=وحنـا خلقنـا الله انجـوم تهـلـه
وانتم كما طير البحر ذاك ابا الحـوم=وطير البحر مايذبحـه غيـر ظلـه

وهذا رد الشيخ ابن هادي

حيّ الكتاب اللي من الـزاج مرشـوم=حيّه وحيّ اللي مشى حشمـة(ن) لـه
ساعة قريته شفت ماعفـت مرسـوم=ردّ النقا تركي وهـو منحـي(ن) لـه
يا سابقي غاشن عتيبـه منـك لـوم=مثل الربيع اليـا غشـى نجـد كلـه
كدّي على العتبان خمسة عشر يـوم=قعدان والجمـال بيتـي هـل(ن) لـه
أطلب عسى نجد(ن) من الوسم ماسوم=حتى تقرّب حلّـة(ن) صـوب حلـة
وان كان رمحك بأول الخيـل ملحـوم=فانا برمحـي حامـي(ن) نجـد كلـه
من شافبا بالحلم يقعـد مـن النـوم=ون شافنـا بالعلـم بطـنـه يهـلـه
عدونا لو جض فـلا هـوب مليـوم=واللي وراه يجضّ من جضة(ن) لـه
حربـك اليـا جانـا نقلنـاه بسهـوم=وتر حربنا لا جاك مـا حتلـت شلـه
وان كان تطري النجم فالنجم مفقـوم=والنجم يدوي والجبل راسـي(ن) لـه
مانشتحن للحرب والحـرب مفهـوم=ويا سعد من حن باللقا فزعة(ن) لـه
ماخلقت الدنيا ولا النـاس فـي يـوم=واللي تمنى حربنـا مضحّـي(ن) لـه
وان كان في نفسه فلاهـوب مليـوم=نعم الشـوارب وافـي الشبـر كلـه
متوسط(ن) مابيـن عتبـان وبقـوم=والله علـم فـي دقّ سلكـه وجـلـه

أعتقد انه كان هناك معركة من أجل هذا الاتفاق الذي خالف الشيخ محمد بن هادي ولكن ليس هناك معلومات عنها

منقول للامانه

[ناصر بن سعود]

بيض الله وجهك يابن مشيب على طرح هذه الوقعة

والله وسبعين نعم بهم

يعطيك الف عافية

ولاهنت

كل التحايا والتقدير لك

[نايف مطلق بن مصيبيح]

ابن مشيب بيض الله وجهك

ماقصرة على ما نقلة

تقبل تحياتي

[احمد الحافي]

يعطيك العافيه
يا ابن مشيب
ولاهنت

[شباب الحافي]

ابن مشيب
بيض الله وجهك

[ابن مشيب]

الله يعافيكم ويبض وجيهكم

على المرور والمشاركه

[بن كليفيخ الوافي]

ابن مشيب
بيض الله وجهك

يعطيك الف عافيه

[ابن مجلبه]

الله يرحمهم جميعا و يتجاوز عنهم


ابن مشيب

بيض الله وجهكـ على ما قدمت

وفيت وكفيت

شكرا لكـ على طرح هذه المعركة


تقبل صادق و ازكى التحايا

[ابن مشيب]

الله يعافيكم ومشكورين

على المشاركه والمرو تحيتى لكم

[سلطان الحافي]

ابن مشيب

سلمت يمناك ولا عدمناك

بيض الله وجهك

وفيت وكفيت


مودتي,,,