الآعتراف ...~

[تركي الثبيتي]

تحرك يا قلم فوق السطور وسطر الأبيات
على نور البدر نصف الشهر في المرقب العالي

ترفق بالقصيدة لا يجي في أطرافها خلات
ترى منزالها في منتدى ماضين الأفعالي

سلام الله على روس الشيوخ ومعقل الطالات
شيوخ اللاّ به اللي للكرم مضرب للأمثالي

أنا ربعي عتيبه عزوتي كسابة القالات
مع أصحاب العقول الراسخة مقدارها غالي

أهل قول وفعل يرتاع منها راعي الهقوات
لها هيبة كبيرة في زمان المر والحالي

على ما يرضى الله ما تقصر ساعة الفزعات
دخيل إحلالها تحمي جنابه بأشهب اللاّلي

لها ماضي مشرف متصل مع ساير الأوقات
تجير المستجير إليا بلوه إعيال الأنذالي

ميادين الشجاعة والشرف والجود والنخوات
تعرف أفعالها قدام ما تنطق بالأقوالي

هنيّ اللّي ورى ظهره قبيله تجبر العثرات
ليا حده زمانه وإعتزى يلقاله إرجالي

قبيلة خصها الله بالوفا ما تعرف الباعات
تشور وتستشير وعلمها في روس عقالي

لهم مني قصيدة ساسها مبني على العادات
على وضح النقا ما جبتها من سوق دلالي

أقدمها لربعي وافتخر وأرفع لها الرايات
مشاعر صادقة للي لهم في الروح منزالي

أنا منهم وفيهم لو بعدت وطالت الغيبات
عليّه حق واجب للجميع إبكل الأحوالي

مقصر وإعترافي من لساني سيد الإثبات
لكن العفو عند المقدره من طبع الأبطالي

وأنا تحت أمرهم وإلهم عليِّ السمع والطاعات
ليا طاوعتهم في طاعة الله ينشرح بالي

أبكتب ما جرالي وأنتظر من ربعي الوقفات
خفايا مشكلة ما جالها في الوقت حلاّلي

بدايتها جمايل في رضى طلاّبة الجاهات
وبالتالي حريقه من شراره تشغل إشعالي

يقولون البخيل اللي بجاهه ساعة الشدات
يجنب عن طريقٍ فيه لأهل الخير مد هالي

ليا نادى المنادي قفل البيبان بالضبات
رياله ما يمده كان ما يكسبله إريالي

عليه أكبر مصيبة يوم يقبل صاحب الحاجات
عظامه ترتعد حتى العرق من جبهته سالي

أنا ماني بجاهل والجهالة كان يوم وفات
تعدى وقتها لو أكثر العقال جهالي

في ليلة قالوا إفزع قلت جاهز وأبرك الحزات
مساعي خير بحته والدروب إعراض وإطوالي

دعاني من محلّي واستجبت الداعي الدعوات
طلبت العون من رب العباد الواحد الوالي

على رأس الوعد تحركت عقارب الساعات
سريت الليل كله وإلتفت إيمين وإشمالي

حشى لله مالي بينهم مطمع ولا غايات
ولا لي في طرفهم لا ولد عمٍ ولا خالي

رجاي إبرحمة الله والعفو من غافر الزلات
ألاقي ما فعلته في نهارٍ ما له إظلالي

على بالي جهودي مع رجال طيبهم ما مات
تقدر خطوة اللي ما سعى في جمع الأموالي

لكن إثر القبايل بعضهم عايش على البارات
مذاهبهم غريبة والفرس من دون خيالي

تنكر للجميل وتجحد المعروف في لحظات
تسوق أموالها وأرباحها في القيل والقالي

ضعاف إنفوس تسعى بالنقد وإتبيت النيّات
تحيّن للفرص وإليا أقبلت للهرج نقالي

بقايا ناس عاشت واستعاشت من ورى النكبات
تبيع وتشتري واللي يبا يكتال يكتالي

وَلَيْد اللاش في عصر الرخا هامة من الهامات
سوات الفار لو غبّر في جحره جاه منهالي

نسي ماضي سنينه واشتهر مع عالم الشهرات
ربايا خالته لو يلتبسله بشت وإعقالي

ألا يا عزوتي هذا زمان اللاّش والعيات
خفافيش الظلام اللي على الأجواد تحتالي

صبرت وطال صبري وإحتسبت وزادت اللوعات
معاناتي تضاعف والهموم ألوان وأشكالي
تجنبت الردى وأهل الردى مرات في مرات
لعلّ الأرض تحت أقدامهم تبلى بزلزالي

بلوني وابتلوني وإسجدوا للظلم والنمات
مضلّلت العدالة تحترف والحق يغتالي

على نار الظليمه تجتمع وإتواصل الغارات
دعاوي زور ترقص والحقايق حظها مالي

لو إظروفي تساعد لنشر القصة على الشاشات
أبيع اللي غدر بي والتحق مع طيب الغالي

جدار الزور عمره ما صمد واستحمل الهزات
مصيره للهدم والأوله ترجع مع التالي

أجل من لّي سواكم يوم راحنّ العلوم وجات
بعد ضاعت جهودي في الرخوم وضاعت آمالي

كلام العاقل اللي ما مشى في سكة الشبهات
بذل جهده وجاهه بالوفا ما هو بطبالي

عليّ الشاهد الله والكتاب وصادق الآيات
على صدقي في قولي لو يجي تفتيش وإسوالي

بعد صبر وجلد دار الزمان وحرك الموجات
تشابك غصب عني سلكها مع سلك الإرسالي

بذور الخير تثمر لو بعد فترة من الفترات
ما دام إعروقها وسط الثرى والجم شلالي

ملفات القضية كاملة للي لهم رغبات
أسري قافلتها لو عليها الغيث همالي

تحرو للحقائق لا تخموها على ما جات
ليا لاحت وبانت لا تجازوني بالإهمالي

دلايلها معي في حوزتي ما فيه ودّ وهات
حقايق ثابتة ما هي سوالف في الخلى الخالي

ليا حان القدر وإستل سيفه جفت العبرات
تروا هذي وصاتي لو قضيت وشدّت إرحالي

تحيات الوفا من شاعرٍ صابر على الصكات
حياته عاشها بين الهموم أيام وإليالي


تركي الثبيتي


[نايف بن مزيد]

صـح لســانـكــ...........

[سلمان عزيز]

تركي صح لسانك قصيده جزله من شاعر جزل

[نايف مطلق بن مصيبيح]

تركي

صح السانك مدد بلاء عدد

جزل جزل

الله يطول في عمرك

[الملفي]

تحيات الوفا من شاعرٍ صابر على الصكات
حياته عاشها بين الهموم أيام وإليالي

صح لسانكـ ولاهنت

تحياتي لكـ

[النايفه]

تعيش ياشاعر على هاذي القصيده الجزله

صح لسانك مليون

[شباب الحافي]

صح لسانك ياتركي

[مشقاص]

صـــح اســانـكـ......

[ناصر بن سعود]

صح لسانك ياتركي

واعتلى شانك

يعطيك الف عافية

ولاهنت

[ابن مشيب]

صح لسانك واعتلا


شانك قصيده جزله من

شاعر جزل تحيتى لك اخوى