سيرة الامير عبدالمحسن التوم

[نايف مطلق بن مصيبيح]

ما كتب عن الأمير / عبدا لمحسن بن غازي بن سهل التوم شيخ قبيلة الحفاه من الروقه من عتيبه رحمه الله

ولد- رحمه الله- في العاشر من محرم للعام 1334هـ
بالقرب من محافظة عفيف.
نشأ رحمه الله في بيت فروسية وعلم ودين .
فقد كان والده فارسا علَّمه الفروسية وحفظه القرآن الكريم
وهو في سن صغير على يد شيخ عسيلة في ذلك الوقت
كان رحمه الله يعرفه ألقاصي والداني وأثبت وجوده ومكانته بنفسه بحر من المعرفة والكرم والعطاء والفزعات تفتخر فيه قبيلة عتيبه كافه.
فكان رحمه الله له مكانه مرموقة لدى حكام دولتنا أعزهم الله بدأ من المغفور له الملك عبدا لعزيز عندما عينه أمير عسيله وهو في بداية شبابه ثم الملك سعود رحمه الله حيث عينه أمير فوج بالحرس الوطني ثم الملك فيصل برغم ما حصل من اختلاف إلا انه كان يشهد له بالطيب فقد قال للأمير عمر بن ربيعان عندما سأله عن التوم (يا عمر يا طيب التوم لكن ما لله وفق بيني وبينه) وعندما توفي الملك فيصل رثاه الأمير عبدا لمحسن التوم بقصيده من أروع ما قيل في رثاء الملك فيصل رحمه الله .
ثم كان من أقرب المقربين للملك خالد رحمه الله وكان الملك خالد يحب السوالف القديمة والقصص والقصائد التاريخية ويستمتع لسرد الأمير عبدا لمحسن التوم لها وكذلك حظي بنفس المكانة مع الملك فهد رحمه الله ومع الملك عبد الله الذي كان من أقرب جلسائه ودائما ما يظهر في التلفاز على يمين الملك عبد الله مباشره في جلساته حفظه الله .
الشاهد من ذلك إن الأمير عبد المحسن التوم كان يحتل مكانه عالية ويحظى بتقدير كبير من آل سعود لما عرفوه عنه من الطيب والرجولة والشهامة والإخلاص لدولته .
تولى عدة مناصب من أمير عسيله وأمير الحفاه وأمير فوج بالحرس الوطني وآمر دوريات الحرس الوطني بالمرتبة الممتازة .
كان رحمه الله شخصيه مميزه ومتحدث بارع وبليغ في الكلام وله هيبته في المجالس ويكون في صدارة أي مجلس يحضر إليه

وقد لقب بعدة ألقاب من أبرزها
معتق الرقاب
كبير الجاه
فقد نظم الشعر في جميع أغراضه منذ صغره رحمه الله.

قال الشيخ عبدالمحسن التوم . شيخ قبيلة الحفاة من عتيبة.

هاض الغرام وعافت النفس نومها = ونفسي من الفرقا تزايد همومها
والصدر كن موقد الجمر داخله = يصلاه من حر الوقايد سمومها
على الجادل الي نازح البعد دونها = قلبي معاشقها ونفسي ترومها
أرجي مواصلها وأغامر بحبها = وأسوق ماتملك يدي في لزومها
أرخص بها حالي ومالي رضا لها = واللي يغالي بالثمن لا يسومها
نبنوبه يهتز للغي عودها = ولا تعشق الا من نوادر قرومها
اللاش ماترضى تشوفه بعينها = لا شافته تغضي وتضفي هدومها
وتقول الخفرات لا تقبلنه = ومن عاشقت مثله عسى الله يلومها
شومن لبذال الندا كاسب الثنا = نفسه على العليا قوي عزومها
قاسي على القاسي وفي مع الوفا = حلحيل حيال الاجت خصومها
الخصم لا زاره تكسر عزايمه = من دون هومات من اول يهومها
يرجع معيف وميس من مطامعه = عينه تعاني من رمدها اهزومها
قطاف تصطي مع لسانه جروحه = ليا عمست الاريا وذلت رخومها
ليا امست الاريا بفكره يدشها = ويمناه تورد بالمنايا سهومها
في ساعة تذهل بها كل مرضعه = من الحشر فالدنيا ليا شان يومها
هذاك عشقت من يبا العز والشرف = لا صار ذا فعله ومقدام قومها
مقدم مناعير برايه يدلهم = بحلم على الجاهل وغشم لغشومها
واللي يبي منه النصف منصف له = ويبطش الا شاف الخطا من ظلومها
له ميزه يعرف بها قبل غيره = بحلم وصفح لين تاقف علومها
والا انقطع حبل السوى من قبيله = ضده جزاها قمعها في خشومها
ومع ذا يمينه طبعها الجود والصخا = وعوايد لاهله يبين رسومها
مبناه بني قبله وزاد ارتفاعه = على مبانيها وسدد ثلومها
عزز قواعدها على شامخ الصفا = وارست بعد هز المعادي عقوبها
الله يستر على هذاه ومثايله = ويقطع رجال ماتفاخر بقومها
الي يبا الطوله هذي خصايله = يتعب ويسهر لين يصعد رجومها
الحر ماياقع على طامن الوطا = الا ماتعلا الرجم يصك حومها
ينهض ابجنحان تشيله مناكبه = وريش اليو مابه شهر مع انجومها
وخلا حناديها تخاشر غرابها = وخلا درجها ساكن عند بومها
يكفيه ضرباته بساطي مخالبه = ورزقه على اللي خالفه من عدومها
والذل ماينفعك وان صابك القدر = والنفس له وقت لها ومحتومها
ومع ذا ترى ماهاض قلبي وضامري = الا الرجال الي تضيع سلومها
مثل الغراب ومشيته والحمامه = تبا قسوم الناس واخطت قسومها
رجال ماغير بشوت وازوال وافيه = تكمل مراجلها بغفوة حلومها
ناس على غفلات الاجواد هذه = على مجالسهم تشلخ الحومها
اهل النمايم فعلها الهرج بالقفا = واهل الشجاعه فعلها مع قدومها
هذا وياسامعها لا تلومني = والبنت في معشوقها لا تلومها
واختم كلامي بالصلاة على النبي = عداد ماتمطر همايل غيومها

قصيدة رائعة جدا ..قالها وهو في لندن يوم السبت الموافق 12 رجب عام 1400 عندما ذهب إلى هناك للعلاج فإليكم هذه القصيدة:

بسم الاله الواحد الفرد الصمد= أرفع يداي بخلوتي وادعيه
أدعيه باسماه العظام وقدرته= ماخاب عبدن في الدجا يدعيه
أرجيه يشفيني ويحفظ غربتي= ماعاد ابا لندن وطاريه
هذا اسبوع ماسمعت المذن= ولا شفت ولامسجد يصلى فيه
هذي بلادن كلها ملعونه=يكود ذكر الله ومواليه
ياعزتي للي سكنها مسلم= الفرض عند عياله يصليه
ماقط يسمع للصلاة منادي= ولا قال صلو نايبن يوحيه
يالله تعصمني وتحفظ ديني = ياخالق عبده وواليه
وتردنا لبلاد عشنا فيها=على شرفنا وديننا نحميه
واليا وصلناها نشوف عيالنا = وراع الرجاء يستر مع راجيه
نشوف جارن حافظين حقوقه=ورفيقنا اللي ون زعلن نرضيه
وقبيلة تفخر ليا شفناها = عتيبه اللي مجده تبنيه
قبيلتن لوجيت أعد فعولها= أمجادها الأقلام ماتحصيه
ياسع والله حظ منهم ربعه=لياجا نهار ابليس ومناديه
ليا جا نهارن راكبن شيطانه=هم أول البيرق وهم تاليه
ليا من شيخ القوم قال : عتيبه= والتم جمعه ثم حدى حاديه
في راي أخو نوره ملكنا خالد= برواحنا عند اللقاء نفديه
الله يجمع شملهم بالطاعه= وتنفيذ حكم شرع الله في مخطيه
ومني صلاة الله مع تسليمه= على النبي ماحل به طاريه

كانت بداية حياته العملية رحمه الله في الحرس الوطني
وظل فيه وفي خدمة بلاده لأكثر من ستين عاماً أمير فوج بالحرس الوطني
وقد زخر شعره بالحماسة الوطنية إذ قال العديد من القصائد في هذه البلاد الطاهرة وفي مناسبات وطنية عديدة لها
ومما قاله في إحدى مناسبات الحرس الوطني:

ترحيبتين أبـدا بهـا وأعودهـا=ترحيبـة ترتيبهـا ببنـودهـا
يا مرحبا من قلب رجل مخلصٍ=عن الحرس ضباطها وجنودهـا
وعن الرجال اللي تروس الألوية=اللي فعايلها على أثر اجدودهـا
والشعب والاوطان كـل يفـرح=لياشاف أبو فيصل يجي ويرودها
بلسان أبو متعب نرحـب كلنـا=بخلاص نافيبه ليا جادو كودهـا
ولي عهد المملكـة زيزومهـا=ليا صعبت القالة يحـل قيودهـا

ولهو قصيدة رثاء في الملك فيصل بن عبدالعزيز آل سعود رحمه الله

يقول فيها:

فاضت دموع العين من حر مـا بهـا=وتكسـرت نفـسٍ كبيـر صوابـهـا
وتفتت كبـدي مـن الحـزن والبكـا=بيـوم بـه العالـم تمـزع ثيابهـا
بيوم الثلوث أظلـم علينهـا نهارهـا=وشمس الضحى عنا اختفت في غيابها
إلى إن قال ------------------ =
ملوكنا آل سعود نفخر بحكمهـم=وبيعة رجال الشعب تملك أرقابها
وحنا نبايعهم بالارواح والدمـاء=يشهد علينا اللي ينشي سحابهـا
على سنة الإسلام نوفي بعهدنـا=والسمع والطاعة على كل ما بها

احتلت قصائد النصح والتوجيه في حياتة مكانة رفيعة
ومما قاله في تربيته لأبنائه رحمه الله:

هذه نصيحه موجه لابنه / الشيخ غازي رحمه الله

أول كلامي بادي بذكر الله=فرض على في الجواب ابداه
والي رفع سبع وسبع بسطها=الارض ارضه وسماء سماه
وحنا عبيده ماعبدنا غيره=على ستطاعتنا في رجاه
ماكلف الله نفس إلا وسعها=والخاسر إلي فلفروض عصاه
كلن على ماخط فلوح ماشي=ماكتب في عالي جبينه جاه
فلوح مكتوب من أهل السعادة=ولا شقي كاتبين شقاه
وخلاف ذا ياهل الاذاعه سجلو=من ذا المواطن ماطرا علاه
مثايلن من عرض ناسً تمثلو=وصيتن من والد لابناه
ونصيحتن للي يبي يعملبها=ولاكلن من قال الجواب حماه
ياغازي بوصيك واوصي اخوانك=وأن طاب حظك ماتريد وصاه
وأن طاب حظك قام يرفعك للعلي=وليا تردا صار داه ارداه
الوله طاعة ربك تشدها=أن كان تبي العز لاتعصاه
ترا المراجل ساسها الدين والتقوي=والحلم والصبر الجميل وجاه
اصبر على الجاهل لاجتك زلته=وحلم علي ماقال في خطاه
يندم على مافات في ساعة الغضب=ويقول هذا الصبر وين لقاه
صبر على الجاهل ماهو مذله=والجهل من عاقل فلا ترضاه
اذا جهل عاقل فخلك صوميدع=اليا عرف فعلك يلين قساه
الخصم لا يلقا عواطفك لينه=حتي يبدل بالهدير رغاه
جارك ترا الله موصي بكرامه=سنة محمد تلزمك بحماه
يقول لولا المشقه بأمتي =لصار جار الرجل من ورثاه
والضيف له في المال فرض على السخي=رحب بظيفك قبل حط قراه
البخل فرجال يكشف عيوبه=ولا سخاء يظفي عليه غطاه
ضيفك يعد الي يشوفه ليا رحل=من واجه يعد مالقاه
دنياك لاتثق بلذات عيشها=كم غافلً اغتر في دنياه
تنكره الايام من عقب صفوها=توريه عقب قبالها قفاه
الله يكافينا حوادث شرورها=ويجعلنا يوم الحساب رضاه
وخلاف ذا ربعك تراهم عضودك=والرجل مايرضا بشق عصاه
ادمح لجاهلهم وحشم كبيرهم=من يفعل الفعل الجميل لقاه
لجاء لزومك ماتذرو دونها=والبيت مايصلح بغير ذراه
بيت بغير لرواق ماينسكن به=برواق واطنابه يسر إبناه
ترا القبيلة عزها جمعاها=واميرها خمالها يرفاه
واختر جليس ناصحً ماغشك=رائه سديد لبغيت تلقاه
رفيق على الشطات مهوب فرخاء=لاجاك ضده تحتيزبه علاه
صبورن جزوم حازمن في مقالته=رفيق الرخاء هذاك لاتباه
ولاتصحبن النمام تعطيه سرك=بركات بو مالك عرف مسعاه
من نملك نبك وهذي وظيفتة=ينقل حديثة من هذه لذاه
يقول قال فلان هذي وهذي=يحلف بالله ماكذب علاه
الله يقبح واحد ذي سواته=عند الولي يوم الحساب جزاه
كلن بيجازه الاله بعملته=ولا بغاء يعفي عفاء مولاه
الله رؤف بالعباد وراحم= والعبد يرجي لو كثر خطاه
يرجي ولي العرش يغفر ذنوبه=والجنة الخضراء تجي مثواه
واختم كلامي بصلاة على النبي=ولاكل من قال الجواب حماه
صلي الله عليه مالاح بارق=وما هل وبل من منشأه

وله هذه النصيحه في ابنه الشيخ نايف والشيخ سعود حفظهم الله

نايف ترى ما بقـى إلا قليلها = تالي الحياة اللي تقفـا نزيلهـا
من أول تحث اركابها يم نزيلها = ذا مغادرهـا وهـذا يجيلهـا
هذا يبي جاهي لحـل عقودهـا = وهذا يبي النفعة ويطلب جزيلها
عادت أبوي اللي ذخرها الوريثها = من طلعتي أمشيبها وارتكيلهـا
إلى أن قال:------------------ =
وختامها يسعود اصمـد وكافـح = وجود بناها ولا تطيـح بنشيلهـا
واجمع إخوانك لا تفرق صفوفهـم = واعرف ترى نفسي قريب رحيلها
ارجي عسى المولى يوسع منازلي = فالجنة الخضراء وبـارد ظليلهـا

وكان رحمه الله من محبي مساجلة الشعراء

أرسل إليه الشاعر المعروف تركي بن نايف الرويس قصيدة مما قال فيها:

البارحة والعين يا طـول ليلهـا=عين تزايد همها مـع هميلهـا
تبكي على ما فات من زين وقتها=واليوم عيا الوقت لا يستويلهـا

والقصيدة أكثر من ثلاثين بيتا:
رد عليه شاعرنا- رحمه الله- ومما قاله:

سميت بسم اللي ينشي مخايلها=محي الفياض أليا تلاطم مسيلها
الواحد اللي ما تعـدد فضايلـه=رب كريم ورحمتـه نرتجيلهـا
يا لله من رحمتك يا فرد يا صمد=دونك فلابه شكـوة نشتكيلهـا
إلى أن قال=--------------------
وقم يا هويدي ولع النار فالحطب=ضوٍ بعيد الـدار عينـه تخيلهـا
ضوٍ سناها يدهله من يشوفهـا=دايم مسايير النشامـى تجيلهـا
إلى أن قال في نهاية هذه القصيدة التي تربو على أربعين بيتا=
ومن يوم أبو نايف شكالي وخصني=قد شاف من ضيم الليالي جليلهـا
أنا على الطيب ترى الطيب مذخره=شكواه أساندهـا وأكمـل كميلهـا
ستين عام إلنا على السير والسرا=وعمر الفتى ما بقـى إلا قليلهـا
والله يخليلي هل المجد والشـرف=أهل السيوف واللي تروي صقيلها
كسابة الأمداح فالشـد والرخـى=اللابه اللـي فالدجـاء ينسريلهـا
إخوان نـورة لاتضايقـت جيتهـم=ويحلونها لو كان صعب تحليلهـا
واختامها مني صلاة علـى النبـي=عداد ما ينشي المطر من مخيلهـا

ومما قيل فيه رحمه الله

يقول الشاعر فيحان بن محمد الضان الحافي

كل علمن يسرك يابو غـازي نجيبـه=وانت تعرف مواقفنـا وتاريـخ اهلنـا
وانت لا جيت فالمجلس يصير لك هيبه=من مواصيلك مع الناس حنـا وصلنـا
وان بغا واحدن فالتوم يظلـم نصيبـه=لازم انـه يدارينـا ويخشـا زعلـنـا
شيحنا اللي ليا مس الحقـب نعتزيبـه=ولو يهوزونـه العـدوان دونـه فتنـا
وان حضرنا مع الاجناب ولا عتيبـه=فيه دارالحديث الجـزل منهـم ومنـا

ومن صفاته رحمه الله الكرم الغير محدود فقد كان يعشي الفوج كاملاً وهذا عمل نادر انفرد به رحمه الله أكثر من مره ومنها عندما انتقل فوجه الى المدينه ومروا في الطريق بعسيله ديرته أمر بأن يقيم الفوج تحت ضيافته في تلك الليله وامر بمية خيمه ومية ذبيحه عند كل خيمه تربط ذبيحه وفي ذلك

يقول الشاعر نمر بن صنت الحافي رحمه الله

ماش أميرٍ ديرتـه شافـت جنـوده=غير جند التوم يـوم الحـظ قايـم
جمعة الموت الحمر جايـن يقـوده=رنًـة الطابـور تقعـد كـل نايـم
جاب له مية طرف مااحصيت زوده=وزعوهـا مثـل توزيـع الغنايـم
كل ما جا منزلـه قلـت محمـوده=جعل ابو غازي لنا فالعمـر دايـم

وكان رحمه الله محباً للخير ساعيا اليه يعطي المحتاج وينصر المظلوم ويفك المساجين واشتهر بفك واعتاق الارقاب فقد تحقق على يده وبفضل الله ثم جاهه اعتاق كثير من الارقاب وفي ذلك يقول الشاعر حبيب العازمي من ضمن قصيده طويله

هذاه التوم ما مثله مع الاصحاب والاجناب=ثلاث ارقاب مرهونه لحد السيف واعتقها

وقال الشاعر / عامر الشيباني عام 15/3/1416هـ
وهذه القصيده طويله ولاكن انها تتحدث عن كثير من شيوخ عتيبه لانود ان نورها كامله ولاكن اخترنا مدحه لشيخ عبد المحسن التوم

ورحنا لشيخ الشيوخ ولقيناه=وتنهظت جنحان فرخ القطامي
ورفرف بجنحان السعد لاعدمناه=وحصل مطاليبه ونال الوسامي
هذاك أبو غازي ليا حل طرياه=عليه مني كل يوم سلامي
من ماكر الأحرار جده ومنشاه =حفاه ليا كثرت عليك الاسامي

مرثية الشاعر/ محمد ابو نياه الحربي في الشيخ/عبد المحسن التوم

البارحة ليلي هواجيس وهمـــــــوم = وروابع مرت عليه عديـــــــــــده
وعيني قزت مالايمت لذة الـــــنوم = لين اشرقت شمس النهار الجديده
وأنا بسهر الليل مانيب ملــــــــيوم = دام العلوم إلي لفتني وكيــــــــــــده
قالوا توفى الشيخ ابو غازي التوم = قلت اشهد ان الموت اخذله ولـــيده
عزالله انه راح من روق زمزوم = وعزالـــله انه في عتيبــه فقيـــــــده
ركن من اركان القبيلة على الدوم = يعرف بحرات ألليال الشــديــــده
ركن من الهيلا غدا اليوم مهدوم = ركــن هـوا من بعـد ميتـه عميـــده
حر مواكيرة على راس مزموم = في شامخ في راس عبطا شديـــــده
شيخ يهوم المرجلة والعلا هوم = من طلعته كنز المراجل رصيــــــده
مالفى الرجال وبالقسى يذبح الكوم = ومشاهد الخطار ريفه وعيــــــده
بيبان قصرة مابعد غلقت يوم = من يوم شيدت ماتلاقا حديـــــــــــــده
ومجالسة فيها الحطب دوم مشعوم = نار توهج في وجاره وقيـــــــــــــده
صف الدلال بجالها عقد منضوم =ونجر يخامس كل حمسة جديـــــــده
وبرية تجلا عمس كل شغموم = ومعها خلاص وسكري مع فريـــــــده
فعل لبو غازي مشاهد ومعلوم = جود عليه الخلـــق تنظـــرشهيــــــــــده
شيخ حكيم الراي مبداه مفهوم= لاكثرت الاريــــا فعنــــده ســديـــــــــــده
رجال عرف ومنطقة دوم محكوم = اليا هرج من يسمعــــه يستزيــــــده
فالدين والا في سواليف وعلوم = وشعر النبط والا فصيـــح القصيــــــده
فقيدة حتى على نايد القوم = يبكية حتى الـــي من اقصــى بــديــــــــــــده
من جاه لو من نايد الناس ملزوم = يقوم معـــه ويلحقــــه مايــريــــــــــده
يفزع معه فيما سعى فيه ويقوم = قومة عضيدٍ مايخيب عضيـــــــــــــده
كم روح محور من الهم مضيوم = حاله أسباب المـــصايب لبيــــــــــده
لا نام معه بكل همُات وعزوم = من شر لوعات الـــدهـر فــك قيــــــــده
ياما بميقافه جلا هم مهموم = وبدل حياته عقـب همــــه سـعـيـــــــــــــده
وياما بجاهه فك كربات محكوم = حكم القصــاص مكـبل في حـديـــــــده
واقف على التنفيذ والوضع محسوم = وفشلت بموضوعه مساعي عديده
مشا بموضوعه بجاهات وسلوم = بحسن النوايا والعلـوم الحميــــــــده
جاب التنازل من خصيم المخصوم = وهانت بعون الله دعاوي كويـــده
وياكم من ام جرحها كان مكلوم = على ضناهــا من بكاهــا جهيــــــــــده
جابه لها واطفى لظى هم مكتوم = لاضمتة عقب أيســت تسـتعيـــــــــــده
ومدت يديها فوق والكف مضموم = صوب السماء وقت التهجد وحيـــــده
تدعي مجيب دعا مسافر ومظلوم = يعظم لبو غازي بالأجر ويزيـــــده
مرحوم يا منهي عدم كل معدوم= بجزايــل هــي عنـد نفسـه زهيــــــــده
لبن القضى لو هو على الناس محتوم= عن مثل ابو غازي خذاله هميـده
لبنه عن اهل الجود يختار لرخوم = من ناس لو عاشت فلا هي مفيـده
وخل الرجال الي مشاكيل وقروم = امثال ابو غازي سنين مديـــده
حيث ان مثله تقصده ناس و تروم = في كل ما أعسرهم نصوه سيــــده
مثل الجدي به يهتدي كل منجـــــوم= كم ناس لو هو عايش مستفيـــــــده
يالله يالي جاعل الرزق مقســـــــوم= يامنزل القرآن هدي وعقيــــــــــــده
تحسن عزا اهله والعزا فيه لعموم = عتيـــــبة الهــــيلا بموت الفقيــــده
وعساه في رحمتك يارب مرحـوم = واغفر ذنوبه ياوليه وسيــــــــــــده
وعساه في قبره مكرم ومحشــــوم = ويمد لحده لـــه مسافة بعيـــــــده
ويعطى له كتابة بيمناه في يــــــوم= يحكم به المولى مصاير عبيـــــــــده
وعساه من نارك محرم ومعصوم = وله في جنان الخد دار مشيــــــــده
وعسا ألبقا والعز من بعده يــــدوم = بكل الرجال اهل العقول الرشيــــده
إلي مربيهم على نهج مرســـــــوم = للمرجله والكل منهم يجيـــــــــده
وازكي صلاة بها القول مخـــــتوم = على النبي راع الصفات الحميــده

الشاعر بندر بن تركي بن هليل الشيباني في الشيخ / عبدالمحشن التوم رحمه الله

ياعلي قرب منك صافي الحديدي=وشيك على زيته وشيك على ماه
لو كان توه من بلاده جديدي=افحص عليه وكمل اللي توراه
نريد والله يقضي اللي يريدي=نزور ابو غازي ونسمع حكاياه
شيخ الطلوح اللي طموحه بعيدي=اللي كسبها في شبابه بيمناه
اللي بنا للعز بيتن جديدي=مشيدا بالعز ساسه ومبناه
ماسكر ابوابه بقفل الحديدي=نمشي على الموتر من الباب لقصاه
لو الشباب اللي مضاله يعيدي=والله لندفع كل شين ملكناه
هذا الكلام اللي من القلب اكيدي=والشاهد اللي عالمن في خفاياه
له موقفن يفرحبه المستفيدي=واللي تغرب هاربن من خطاياه
في غربته خايف وخوفه شديدي=دايم تخالف في مصيره حضاياه
جالن عن احبابه وخصمه عنيدي=مايرحمه لو ينتخي ويترجاه
ويصبح بعد خوفه وهمه سعيدي=وتفرح عيونن باكيه بعد فرقاه
وتصير كل اوقاته افراح عيدي=وكلن يقدم من سروره هداياه
موقف فريد ومن وقف به فريدي=من غير ابو غازي يسوي سواياه
يفداه من قضا حياته وحيدي=لو كان اله شهره وفالناس اله جاه
دوبه غناته منه مانستفيدي=خسران من زاره من البعد يبغاه
يطق بابه لين ضغطه يزيدي=وقالوا بعد بكره مع العصر تلقاه
قال افتحو طرقي وداري بعيدي=ابتريث عندكم واتحراه
قالوا هذا مجنون ولا بليدي=يقول هرجن عمرناماعرفناه
وعود من الاحزان مايستزيدي=يبكي ومن شافه مع الدرب بكاه
من غير ابو غازي لحزنه يفيدي=ويفتح له ابوابه ويسمع حكاياه
لو كان كلن يزعم انه عميدي=لكن صعبات المشاكل تحداه
ويالله ياغافر ذنوب العبيدي=اللي جميع الخلق ترجي عطاياه
تامر لبو غازي بعمرن مديدي=وعسى ليا جينا نبا البيت نلقاه

هذه قصيدة رثاء في الأمير عبدالمحسن التوم الحافي رحمه الله لأبنته صيته عندما علمت بنباء وفاة ابيها رحمه الله

علمن لفاني تالـي الليـل قاسـي=أصعب خبر خلى ضلوعـي يلجـن
مرحوم يا عزي ويا تـاج راسـي=يلي إلـك كـل الصعايـب يلينـن
راسي كما ترسي الجبال الرواسي=كـل الفعـول الطيبـه لـك يلبـن
هداج تيما فـي الليـل القواسـي=يمناك للمحتاج تعطـي بـلا مـن
مع جانبن لين وحكمـة سياسـي=وأفعال طيبيـن للنشامـى يعـدن
كم دست لك رأي قبل ما يداسـي=يلي تهوز من المراجـل صعبهـن
ما هي فعول مطوليـن الحساسـي=مواقفـك بطيـب تشهـد وتعلـن
يا بوي لك في الطيب منهج دراسي=تاريخ أبيض في الصحايف يـدون
يالبسـن ثـوب المعـزة لباسـي=الجود بيت ومحفل المجـد موطـن
محدن لفعلك يا أبيض الوجه ناسي=عسى لك الفردوس منزل ومسكـن
والله لولا الدفـن فـرض أساسـي=يا بوي وسط الأرض والله ما تدفن

توفي رحمه الله يوم الاحد 19/10 عام 1423 وقد اكتظ جامع عسيله للصلاه عليه مودعين ركن من أركان القبيله وأمير من اومراها الكبار عاش عظيما
ومات كريم النفس مخلفا ورائه الذكر الطيب والأعمال الطيبه
فلا يمكن ان تنساه قبيلة عتيبه غفر الله له واسكنه فسيح جناته
وجعل قبره روضه من رياض الجنه .

قريبا ان شاء الله سوف ننزل الجز الثاني من سيرة الامير عبدالمحسن التوم رحمه الله

[/align]

[Google]

سيره عن شخصيه مثل الامير/عبدالمحسن التوم

مهمه

بيض الله وجهك ابو راكان وسلمت يدينك

لاتحرمنا مثل هذه المواضيع

كل التحيا لك

[عبدالرحمن الحمد]

الله يرحمه ويسكنه فسيح جناته
سيره ذاتيه تحكي عن رجل عظيم
اشكرك ابو راكان على الموضوع
تقبل مني خالص الشكر والتقدير
مع التحيه

[احمد بن مسفر التوم]

يعطيك العافيه ابوراكان
وأميرنا سيرته عظيمه
ركن من أركان عتيبه
رحمه الله

[ناصر المنصور]

رحمة الله واسكنه جنان النعيم
ابو غازي حاله علم من أعلام عتيبه

عز الحفاة ..ودائما ما يردد الحفاه عزوني

[سوالف]

رحمك الله يا ابو غازي



وبيض الله وجهك يا ابو ركان


ما جمعت وما اضفت في سيرة اميرنا رحمة الله

[المايسترو]

الله يرحمه رحمةً واسعه

ونعم بأبو غازي .. سيرة رائعة

لاهنت يابو راكان

[نايف مطلق بن مصيبيح]

الاشكر على واجب اخواني الاعزاء

نحن نبذل الجهد التوسع في معرفت من خدمو هذه القبيله

ومن شرفوها

فكلنا يد واحده وقلم واحد يسطر كل ما يخدم قبيلته

ولكم خالص الشكر وتقدير على المرور العطر

[ناصر الحافي]

رحم الله الامير عبدالمحسن بن غازي التوم

اسم يخلده التاريخ وتعجز عن الاقلام


لاهنت يابو راكان على هذا الطرح المتميز

[الباشا الهلالي]

وونعــــم والله في ابو غـــازي
والله يرحمه ..