يقول حافيا مولع ومولاع للشاعر الكبير / فيحان الرقاص

[سجا]

يقـول حافـيّـاً مـولّـع ومــولاع

جايّـه مـن الدنيـا همـوم وغرابيـل


منه الضميـر وواهـج القلـب يـلاّع

كمـا يلـوع الشعـف لـدن السنابيـل


ياراكب اربع ربع من عقـب مربـاع

شعـل شمعليّـات رمـل ٍ مرامـيـل


فج ّ ٍ مناكبهـن علـن لمـس الأقـواع

يعـرج بهـن إليـا عطـن ّ المداهيـل


خضـع الرقـاب ومشيهـن بالتخـوّاع

قطـم الفخـوذ لحومهنّـه معـازيـل


عصو عصاو وبالعصا عصو وأطواع

ومربعـات ٍ فـي سجـا كلّهـن حيـل


مافوقهـن الا الجـواعـد والانـطـاع

وعيـال فـي دوج الغـداري دواليـل


مسراحهن من ديـرة المـد والصـاع

دار بخيلـه ميـر أهلـهـا مشاكـيـل


إلهن صـلاة الصبـح بغثـاه منشـاع

منشـاع مرميّـات خطـو المغازيـل


والدرب من بين العرايـس ليـا تـاع

والعصـر يـم الخنفسـيّـه مخالـيـل


انصو فريدة شعر من حيـث الاسنـاع

وماجذبكـم شـوف مــد الدرابـيـل


لازم يطالعكـم مـع اللـيـل لـمّـاع

نـارا ً يقـرّب جمرهـا للمعامـيـل


اول شببكـم خمـس طبخـات ٍ اتبـاع

بـريّـة ٍ مابـهّـرت بالزبنـجـيـل


وبيت ٍ يشيّـد يـوم حلّـو بالاسـراع

بيـت ٍ لشـرّاب الحشايـش مداهـيـل


ونجـر ٍ يلجلـج والمخاليـق هـجّـاع

تلقـى رويمـي يقرعـه تالـي الليـل


ومجـالـس ٍ ماقطّـعـت بالتلـمّـاع

من جاء محيّا ً به ومـن راح ماسيـل


في ضف ابو نايف حمى قاصر البـاع

يـوم الخفـاف يجانبـون الزمامـيـل


يلوذبـه مـن كـان ميّـس ومرتـاع

لـن رفّعـوا لقطيّـهـن المساحـيـل


ولا الغفيلـي بسلّـة الهـنـد قـطّـاع

سيف ٍ مصقّل مـن خيـار المصاقيـل


حـوّاف للاعـداء وفـارس وقطّـاع

وحـزام بالكربـه وبالصبـر حلحيـل


وبن خنيصر في ضحى الكـون بيّـاع

يهـوي عليهـم مثـل طيـر النبابيـل


وغيره ليـا شـاف المساييـر شـوّاع

ويفّرق اللـي يلزمـه مـن محاصيـل


ماهـو معيثيـر ٍ خبـيـل ٍ وقـبّـاع

وإن جاك في وسط المجالس ليـا فيـل


وفيهم ترى ابن التوم للهجـن مـزواع

ربعي ذوي ربعـي كـرام ومشاكيـل


إرجـال عـرف ٍ وللـديـن تـبّـاع

وعيّـات لغصـون البلنـزي نواتيـل


إمخضبّـه بايمانهـم كـل مـسـواع

للريـم فـوق أرقابهـنّـه عرابـيـل


غازي وضيف الله على كـل الانـواع

ربع ٍ علـى كثـر الخسـاره مراحيـل


ومعجب عشير إمخوتمت عشر الأصباع

وابو سنـد خصّـوه ذيـب الرياجيـل


ثم انصوا اللي رفقتـه تبـر الاوجـاع

برجس سعد قلبـي ليـا ضـدّه الشيـل


ومن عقب برجس درّجوا لاخو هـزّاع

فازع حديـد الهنـد عطـب المواشيـل


وباق العرب صدقان لكـن إلـي نـاع

ماكـل ّ ٍ اتعبلـه أركـان ومراسـيـل


مايبهج الضميـان ضحضاحـة القـاع

ولايبـرد الحـسّـات زود التعالـيـل


ولاواحـد ٍ جـايـز بلـيّـا تمـتّـاع

ولاوداي ٍ يخضر جنابـه بـلا سيـل

[المايسترو]

صح لسانه .. شاعر متمكن

الله يرحمه

لاهنت على القصيده

[سجا]

شكرا لك تقديري مايسترووووو

[خالد بن عايض]

بيض الله وجهك ياسجا

ولاهنت اخوي

على النقل الاكثر من رائع

واسمحلي بنقلها لقسمها الصحيح

يعطيك الف عافيه

[عبدالرحمن المتعب]

سجا يعطيك العافية

[حافي]

الله أكبر عليك بيض الله وجهك على هذا الطرح
والله يرحم شاعر الحفاه الكبير فيحان الرقاص

[ناصر الحافي]

رحم الله الشاعر الكبير فيحان الرقاص

سجا

يعطيك العافيه على حسن الاختيار

[سجا]

شكرا اخواني على الاطراء ويعطيكم العافيه على مروركم

[احمد بن مسفر التوم]

يعطيك العافيه والله يرحم الشاعر

[مرزوق الحافي]

يعطيك الف عافيه


والله يرحم الشاعر/فيحان الرقاص


تحياتي لك